गैंडाकोट । विश्व खाद्य स्वच्छता दिवस २०२४ को साताव्यापी कार्यक्रमको सातौं दिन शुक्रबार खाद्य स्वच्छता सम्बन्धी सचेतना कार्यक्रम सम्पन्न भएको छ । खाद्य प्रविधि तथा गुण नियन्त्रण डिभिजन कार्यालय, दमौली तथा खाद्य वैज्ञानिक तथा प्राविधिक संघ, नेफोस्टा नारायणी च्याप्टरको आयोजना कार्यक्रम भएको हो । कार्यक्रममा ३० जना (फास्टफुड) व्यवसायीलाई खाद्य स्वच्छतासम्बन्धी सचेतना कार्यक्रम सञ्चालन गरिएको हो ।

नेफोस्टा नारायणी च्याप्टरका वरिष्ठ सल्लाहकार, खाद्य प्राविधिक टंकमणि काफ्लेको अध्यक्षतामा भएको कार्यक्रममा गैंडाकोट नगरपालिका उप–प्रमुख शान्ति कोइराला प्रमुख अतिथि थिइन् ।

कार्यक्रममा विशिष्ठ अतिथि उद्योग वाणिज्य संघ, नवलपुर जिल्लाका अध्यक्ष दीपक सापकोटा, अतिथिहरू गैंडाकोट नगरपालिका सामाजिक विकास अधिकृत देवेन्द्र गौतम, स्वतन्त्र पत्रकार संघका केन्द्रीय अध्यक्ष कृष्णप्रसाद बास्तोला, नागरिक कलेज गैंडाकोटका क्याम्पस प्रमुख छविलाल कँडेल रहेका थिए । नेफोस्टा नारायणी च्याप्टर सदस्य सुदीप अधिकारीले सञ्चालन गरेको कार्यक्रममा स्वागत नेफोष्टा नारायणी च्याप्टरका सदस्य शरद् अधिकारीले गरेका थिए ।

कार्यक्रम संयोजन खाद्य डिभिजन दमौलीका कार्यालय प्रमुख खाद्य अनुसन्धान अधिकृत ज्योति आचार्यले गरेका थिए ।

व्यवसायीलाई खाद्य अनुसन्धान अधिकृतले खाद्य स्वच्छता कायम गर्ने सम्बन्धमा जानकारीमूलक प्रस्तुति दिएका थिए ।

गैंडाकोटका उपप्रमुख शान्ति कोइरालाले कार्यक्रम सफल भएको तथा आउने वर्षमा नगरपालिकाले कम्तीमा १ जना खाद्य प्राविधिक राख्न पहल गर्ने बताइन् ।