पोखरा । अन्नपूर्ण ८, दाङसिङ निवासी इशा विकको उपचारमा सहयोग पु¥याउन आर्थिक संकलन गरिएको छ ।

स्थानीय प्रेमबहादुर विककी २९ वर्षीया छोरी इशालाई ब्रेन ट्युमर भएको छ । उनको उपचारमा ७ लाख लाग्ने भएकोले दाङसिङ गुरुङ सम्पर्क मञ्च र दाङसिङ तमु समाज युकेको नेतृत्वमा रकम संकलन गरिएको हो । संकलित ३ लाख २० हजार शुक्रबार बिरामी इशा र बुबा प्रेमलाई हस्तान्तरण गरियो ।

मञ्चका अध्यक्ष क्याप्टेन काजीमान गुरुङले रकम हस्तान्तरण गरेका हुन् ।

कांग्रेस क्षेत्र ३ का सभापति मनोज गुरुङ, अन्नपूर्ण ८ का वडा अध्यक्ष विजय गुरुङ, कांग्रेस महाधिवेशन प्रतिनिधि विष्णुबहादुर क्षत्री, सहसचिव नवीन सिग्देल, कांग्रेस क्षेत्र ३ का सदस्य तिलकबहादुर कुँवरको रोहवरमा संकलित रकम हस्तान्तरण गरिएको हो ।

दाङसिङ तमु समाज युके अध्यक्ष राजबहादुर गुरुङको नेतृत्वमा १ लाख ७० हजार, दाङसिङ गुरुङ सम्पर्क मञ्चको नेतृत्वमा १ लाख ६ हजार, अन्नपूर्ण गाउँपालिका वडा ८ बाट ३७ हजार र कांग्रेस कास्कीका सदस्यबाट ६ हजार ५ सय संकलन भएको रकम संकलन समिति संयोजक पुरण गुरुङले बताए । मञ्च अध्यक्ष क्याप्टेन काजीमान गुरुङले ढुक्कसँग उपचारमा ध्यान दिन आग्रह गर्दै आवश्यक परे अझै सहयोग संकलन गर्ने प्रतिवद्वता व्यक्त गरे । कांग्रेस क्षेत्र ३ का सभापति मनोज गुरुङले मानवीय सेवा सबैभन्दा ठूलो धर्म भएको बताए ।