पोखरा । प्रतिभा माविमा बिहीबारदेखि गण्डकी प्रदेशस्तरीय ‘रचनात्मक, खेलकुद तथा सूचना प्रविधि फेयर’ सुरु भएको छ । एसइई दिएर बसेका विद्यार्थीका लागि आयोजितको प्राचार्य किरण सापकोटा, वित्त निर्देशक विश्वगोपाल पराजुली लगायतले उद्घाटन गरे ।

३ दिनसम्म चल्ने फेयरमा २ हजार जनाभन्दा बढी विद्यार्थी सहभागी हुने प्राचार्य सापकोटाले बताए । फेयरमा प्रदेशका विभिन्न जिल्लाका विद्यार्थी सहभागी छन् । विद्यार्थीले व्यक्तिगत, समूहगत वा विद्यालयबाट सहभागिता जनाएको प्राचार्य सापकोटाले बताए ।

उनका अनुसार विज्ञान हाजिरीजवाफ, नेपाली वक्तृत्वकला, छात्र तथा छात्रा बास्केटबल, भलिबल, टेनिस, चेस, ब्याडमिन्टन, फुटसलका प्रतियोगिता हुनेछन् । त्यस्तै सूचना प्रविधिका गतिविधिबारे पनि जानकारी पाइने उनले बताए ।

‘एसइई दिएर बसेका विद्यार्थीलाई सक्रिय बनाउन र उनीहरु भित्रको प्रतिभा प्रस्फुटन गराउनका लागि कार्यक्रम गरेका हांै,’ सापकोटाले भने, ‘घरमा बसिरहनुभन्दा विद्यार्थीलाई यो बेला सक्रिय राखिराख्यो भने उनीहरु भित्रको प्रतिभा प्रस्फुटन हुनेछ । उनीहरुलाई कुनै न कुनै गतिविधिमा सहभागी बनाएर सक्रिय बनाउन आवश्यक छ ।’
माइ सेकेन्ड टिचर (एमएसटी) सँगको सहकार्यमा सूचना प्रविधिसँग सम्बन्धित कार्यक्रम गरिने उनले बताए । सापकोटाका अनुसार प्रतिभा माविले विद्यार्थीलाई आवश्यकता अनुसार अतिरिक्त पाठ्यक्रम अध्यापन गराएर अब्बल बनाउने गरिएको छ ।

प्रतियोगितामा उत्कृष्ट विद्यार्थीलाई नगद पुरस्कार पनि दिइनेछ । सबै सहभागी विद्यार्थीले प्रमाणपत्र पाउनेछन् ।

माइ सेकेन्ड टिचरका गण्डकी प्रदेश प्रमुख विवेक श्रेष्ठले प्रविधिलाई जोडेर यो कार्यक्रम आयोजना गरिएको बताए । विद्यालयका बिहानी सत्रका व्यवस्थापन विषयका संयोजक डा. बोधराज ढकालले विद्यार्थीलाई सक्रिय र रचनात्मक बनाउन यस्ता कार्यक्रम आवश्यक रहेको बताए ।

पोखरा पालिखेचोकस्थित प्रतिभामा कक्षा ११ र १२ तर्फ व्यवस्थापन, होटल व्यवस्थापन र विज्ञान संकायमा अध्यापन हुँदै आएको छ ।