पोखरा । आइसिसी टी–२० विश्वकप क्रिकेटमा नेपालले पहिलो खेलमा नेदरल्याण्डलाई १०७ रनको लक्ष्य दिएको छ ।

अमेरिकाको डालसस्थित ग्राण्ड प्रेरी रंगशालामा भएको खेलमा नेपालले १९.२ ओभरमा सबै विकेट गुमाउँदै १०६ रन जोडेको थियो । प्रतियोगितामा रोहित पौडेलले सर्वाधिक ३७ रन जोड्न सके । उनीसहित ४ खेलाडीले मात्र दोहोरो अंकको रन बनाएका हुन् ।
करण केसीले १२ बलमा १७ रनको योगदान दिए । उनले २ छक्का हाने । गुल्सन झाले १५ बलमा १४ रन जोड्दा १ छक्का हानेका थिए । अनिल शाहले १२ बलमा २ चौका मद्दतमा ११ रन बनाए ।

निकै आशावादी सोमपाल कामी शून्य रनमै आउट हुन पुगे । उनी मात्र एक यस्तो खेलाडी हुन्, जसले टि २० विश्वकममा दोस्रो पल्ट भाग लिएका छन् ।

नेपालले १० वर्षपछि आइसिसी टी–२० विश्वकप क्रिकेटमा पुनरागमन गरेपछि यो खेललाई विश्वभरका नेपालीले निकै महत्वका साथ लिएका छन् ।

विश्वकपमा नेपाल र नेदरल्यान्ड समूह ‘डी’ मा छन् । नेपालको समूहमा टेस्ट मान्यताप्राप्त राष्ट्र दक्षिण अफ्रिका, श्रीलंका र बंगलादेश छन् । समूह ‘डी’ मै रहेको दक्षिण अफ्रिकाले श्रीलंकालाई ६ विकेटले पराजित गर्दै प्रतियोगितामा सुखद सुरुआत गरिसकेको छ।

नेपालले यसअघि सन् २०१४ मा पहिलोपटक टी–२० विश्वकप खेलेको थियो । काठमाडौंमा गत कात्तिकमा मूलपानीस्थित माथिल्लो मूलपानी क्रिकेटमैदानमा भएको एसिया छनोट खेलमा नेपालले युएईलाई सेमिफाइनलमा पराजित गर्दै विश्वकपमा स्थान पक्का गरेको थियो ।

विजेता टोलीले २४ लाख ५० हजार अमेरिकी डलर पुरस्कार पाउँदा उपविजेताले १२ लाख २८ हजार डलर पाउनेछन् ।

त्यस्तै विश्वकपमा सेमिफाइनलमा पुग्ने २ टोलीले जनही ७ लाख ८७ हजार डलर पाउने छन् भने प्रतियोगितामा सहभागी सबै टोलीले २ लाख २५ हजार अमेरिकी डलर पाउने छन् ।

पोखरा पृथ्वीचोकमा बिग स्क्रिनमा क्रिकेट हेर्दै दर्शक । तस्बिरः दुर्गाप्रसाद पौडेल