पोखरा । कास्कीका प्रमुख जिल्ला अधिकारी भरतमणि पाण्डेले कार्यभार सम्हालेका छन् । वासुदेव घिमिरे सरुवा भएपछि उनको ठाउँमा आएका पाण्डेले सोमबार कार्यभार सम्हालेपछि मंगलबार पोखराका पत्रकारसँग अन्तरक्रिया गरेका छन् ।

आफूले जिल्लाको वस्तुस्थिति बुझिरहेको भन्दै नागरिकलाई सेवा प्रवाह गर्ने सवालमा कुनै सम्झौता नगर्ने प्रजिअ पाण्डेले बताए । पर्यटनको राजधानी घोषणा भएको पोखरा २४ सै घन्टा खुलाउनेदेखि अरु विकास निर्माणका काममा सहजीकरण गर्ने उनको भनाइ थियो । मकवानपुर र रुपन्देहीको प्रजिअ भइसकेका पाण्डेले ती जिल्लाबाट सिकेको अनुभव कास्कीमा प्रयोग गर्ने बताए ।

राजनीतिक दल, नागरिक समाज, प्रदेश र स्थानीय सरकारसँग समन्वय गरेर अगाडि बढ्ने प्रतिबद्धता उनले जनाएका छन् । राष्ट्रिय परिपत्र र नागरिकताको प्रतिलिपी लिनेहरुको भीड कार्यालयमा अत्यधिक रहेकाले त्यसलाई कम गर्न पहल थालिसकेको प्रजिअ पाण्डेले बताए । कार्यक्रममा सहायक प्रजिअ गुरुदत्त ढकालले प्राप्त सुझाव अनुसार प्रशासनले सेवा प्रवाह गर्दै आएको बताए ।

कार्यक्रममा सहभागी पत्रकारले कास्की र पोखरमा देखिएका समस्या र समाधानका उपायका बारेमा प्रजिअलाई जानकारी गराएका थिए ।