पोखरा । डेढ महिनादेखि हराइरहेका कास्की अन्नपूर्ण गाउँपालिका–३, पाउँदुर, धारापानीका ५७ वर्षे टेकबहादुर सार्कीको खोजी गरिदिन उनको परिवारले आग्रह गरेको छ ।
करिब ५ फिट ५ इन्च उचाइ तथा अनुहारमा कालो पोतो भएका टेकबहादुर गत वैशाख ७ गतेदेखि कोही कसैलाई जानकारी नदिई आफ्नै घरबाट हिँडी हालसम्म हराइरहेको छोरा कुशल नेपालीले बताए ।
हराउने बेला टेकबहादुरले ढाका टोपी, रातो टिसर्ट, कालो इस्टकोट, कालो पाइन्ट र चप्पल लगाएको कुशलको भनाइ छ ।
हराएका टेकबहादुरको खोजीमा उनको परिवार हालसम्म कास्कीका प्राय सबै स्थान, बागलुङ, पर्वतदेखि भक्तपुरसम्म पुगिसकेको छ । परिवारले घटनाबारेमा स्थानीय नागडाँडा प्रहरी चौकी भदौरेतामागी, जिल्ला प्रहरी कार्यालय कास्कीलगायत विभिन्न ठाउँका स्थानवासी एवं संघ संस्थाका प्रतिनिधिलाई समेत खोजतलासमा सहयोग गरिदिन आग्रह गरेको छ ।
टेकबहादुरलाई कसैले भेटेमा ९८१९१९८१३८ वा ९८१७१८३५६२ का खबर गरिदिन परिवारले अनुरोध समेत गरेको छ । टेकबहादुरका श्रीमती, ३ छोरा, २ बुहारी, छोरी तथा ४ जना नाति छन् ।