लेखनाथ । पोखरा २७, स्थित तालचोकमा रहेको त्रिवेणी इन्टरनेसनल कलेजमा उद्योगी र व्यवसायीबिच संवाद एवं अन्तक्र्रिया कार्यक्रम सम्पन्न भएको छ ।
त्रिवेणी इन्टरनेसनल कलेजको आयोजनामा भएको कार्यक्रममा क्याम्पस सञ्चालन समिति अध्यक्ष सुमन भट्टराईको अध्यक्षता तथा नेपाल उद्योग वाणिज्य महासंघका पूर्व अध्यक्ष आनन्द मुल्मीको प्रमुख आतिथ्यतामा भएको थियो ।

लेखनाथ क्षेत्रका उद्यमी उद्यागी व्यवसायी, वित्तीय संस्थाका प्रतिनिधि, सरकारी निकायका प्रतिनिधि, शैक्षिक व्यक्तित्व, पत्रकार, विद्यार्थीलगायतको सहभागितामा भएको कार्यक्रममा क्याम्पस प्रमुख यदुराज आचार्यले कार्यक्रमको औचित्यबारे प्रष्ट पारे ।

दुई सत्रमा विभाजन गरिएको कार्यक्रमको पहिलो सत्रमा पृथ्वीनारायण क्याम्पसका अर्थशास्त्र विभागका प्राध्यापक समीर बरालले विद्यमान पाठ्यक्रम र बजारको आवश्यकता विषयमा कार्यपत्र प्रस्तुत गरेका थिए । उनले देशको अर्थतन्त्रमा आएको परिवर्तनसँगै रोजगार क्षेत्रमा भएको परिवर्तन, त्यसका असर, प्रतिभा पलायनको अवस्थाबारे प्रष्ट पार्दै आगामी समयमा उद्यमी र उद्यमशीलतालाई शिक्षासँग जोड्न थप गर्नुपर्ने कार्यबारे उल्लेख गरे ।

दोस्रो सत्रमा प्राडा. हरिप्रसाद पाठक, प्राडा इन्द्रप्रसाद तिवारी, प्राडा सूर्यबहादुर जिसी, लेखनाथ उद्योग वाणिज्य संघका अध्यक्ष विनोद श्रेष्ठ, पूर्व अध्यक्ष बाबुराम गिरी, छत्रधर आत्रेय र द्वितीय उपाध्यक्ष विक्रम कर्मचार्यले क्याम्पसले उद्योगी व्यवसायी, बैंकिङ क्षेत्र लगायत रोजगारदातासित नियमित समन्वय तथा संवाद गरेर नै पाठ्यक्रम तयार पारी त्रिभुवन विश्वविद्यालयबाट स्वीकृत गराई अध्यापन गराइरहेको बताए ।

कलेजका उपप्राध्यापक डिल्लीराम पौडलले कार्यक्रम सञ्चालन गरेका थिए ।