पोखरा । विन्दुवासिनी संस्कृत विद्यापीठमा प्राज्ञिक लेखन कार्यशाला तथा तालिम भएको छ । विद्यापीठअन्तर्गतको अनुसन्धान व्यवस्थापन एकाइ आयोजना र विश्वविद्यालय अनुदान आयोग सहयोगमा ५ दिनसम्म सो कार्यशाला तथा तालिम भएको हो । जसमा प्राज्ञिक लेखनका विषयमा कार्यपत्र प्रस्तुति, छलफल, लेखन अभ्यास र प्रस्तुतीकरण भएको थियो ।

कार्यक्रममा ७ कार्यपत्र प्रस्तुत गरिएको अनुसन्धान व्यवस्थापन एकाइका सदस्यसचिव उपप्रा. प्रकाश पौडेलले बताए ।

कार्यक्रम उद्घाटन गर्दै पृथ्वीनारायण क्याम्पसका संस्थापक क्याम्पस प्रमुख जर्ज जोनले आजको युग प्रकाशनको रहेको हुँदा प्राध्यापकले गरेको प्राज्ञिक वा कार्यमूलक अनुसन्धानलाई लिपिबद्ध गरी प्रकाशन गर्नुपर्ने र त्यसका लागि यस्ता कार्यक्रम उपयोगी बन्ने बताए ।

विद्यापीठका प्राचार्य प्राडा जगन्नाथ रेग्मीले कार्यशालामा विभिन्न विज्ञबाट प्राज्ञिक लेखन सम्बन्धमा महत्वपूर्ण जानकारी प्रदान गरिने बताए । यस सत्रमा विद्यापीठको प्रगतिशील प्राध्यापक संगठन अध्यक्ष उपप्रा. श्यामप्रसाद पौडेल, अंग्रेजी विभागका अध्यक्ष प्रा. सत्यराज सुवेदी, सहप्रा. डा. भोलानारायण रेग्मी, एकाइका संयोजक चूडामणि कँडेललगायतले मन्तव्य राखेका थिए ।

कार्यक्रममा प्राडा नारायण चालिसे, डा. खगेन्द्र घोडासैनी, डा. श्रीधर न्यौपाने र डा. त्रिभुवन बरईले कार्यपत्र प्रस्तुत गरे । उनीहरूका कार्यपत्रमा लघु अनुसन्धान प्रस्तावनालेखन, प्राज्ञिक लेखन, सुलेखन विधि, भावहरण र विभिन्न प्रकारका संकथन पहिचान र लेखन सिपसँग सम्बद्ध थिए । प्राडा जगन्नाथ रेग्मी, सहप्राडा भोला नारायण रेग्मी सहप्रा. आनन्दमणि रिजाल, सहप्राडा काशीनाथ कँडेल, उपप्रा. प्रकाश पौडेलले छलफलका सत्र सञ्चालन र लेखन कार्यशालाको संयोजन गरेको कार्यक्रममा विभिन्न १४ ओटा सत्रमा कार्यपत्र प्रस्तुति र छलफल, ३ ओटा सत्रमा लेखन कार्यशाला र ३ सत्रमा समूहगत प्रस्तुतीकरणमाथि विज्ञबाट पृष्ठपोषण प्रदान गरिएको थियो ।

समापनमा नेपाल संस्कृत विश्व विद्यालय सेवा आयोग सदस्य सचिव प्रा. मुरलीमोहन बास्तोलाले कार्यक्रमका कार्यपत्र प्रस्तोता, सहजकर्ता र सहभागीलाई प्रमाणपत्र वितरण गर्दै केही प्राप्त गर्न गरिने उद्देश्यमूलक अनुसन्धानभन्दा समाजका लागि गरिने दायित्वपूर्ण अनुसन्धानले व्यक्तिलाई फाइदा पुग्ने बताए ।

पृथ्वीनारायण क्याम्पसको विद्यार्थी कल्याण शाखा प्रमुख उपप्रा. डा. बोधराज ढकाल, प्राचार्य प्राडा जगन्नाथ रेग्मी र सहप्रा.चूडामणि कँडेलले मन्तव्य राखेका थिए । सहभागीबाट पृथ्वीनारायण क्याम्पसका उपप्राध्यापक गीता पौडेल गुप्तेश्वर बहुमुखी क्याम्पसका उपप्राध्यापक जमुना अर्याल र उपप्रा. गणेश शर्मा सुवेदीले कार्यक्रम प्रभावकारी र उपलब्धिपूर्ण रहेको बताए । कार्यक्रममा विद्यापीठ तथा पोखरामा रहेका त्रिविका आंगिक तथा सम्बन्धनप्राप्त क्याम्पसमा कार्यरत् ४० जना प्राध्यापकले भाग लिएका थिए ।