पोखरा । अन्नपूर्ण गाउँपालिका–६, लुम्लेस्थित संगम माध्यमिक विद्यालयको अध्यक्षमा चित्रबहादुर गुरुङ सर्वसम्मत चयन भएका छन् ।
शुक्रवार बसेको अभिभावक भेलाले पूर्व वडाध्यक्ष समेत रहेका गुरुङको अध्यक्षतामा समिति चयन गरेको हो । जसका सदस्यहरूमा गणेशबहादुर जिसी, दिनेशकुमार जिसी, पार्वती देवकोटा, शकुन्तला देवकोटा र मनु विक छन् ।

वडाध्यक्ष एकदेव देवकोटा पदेन सदस्य, टंकप्रसाद देवकोटा शिक्षक प्रतिनिधि तथा सदस्य सचिवमा प्रधानाध्यापक रीता खनाल देवकोटा चयन भए । भेलाले नवराज पौडेलको अध्यक्षतामा ९ सदस्यीय शिक्षक अभिभावक संघ पनि गठन गरेको छ ।

भेलालाई सम्बोधन गर्दै शिक्षा अधिकृत बलराम भुगाईंले समिति गठनका नियमबारे प्रकाश पार्दै समितिको एक मात्रै ध्यान शैक्षिक गुणस्तर वृद्धि हुनुपर्नेमा जोड दिए । उनले विद्यालयका जुनसुकै आवश्यकता पूरा गर्न पालिका तयार रहेको स्पष्ट पारे ।

गाउँपालिका प्रवक्तासमेत रहेका अन्नपूर्ण ७ का अध्यक्ष भरतमान गुरुङले विद्यालयलाई जोगाइराख्न लुम्ले स्थानान्तरण गरिएको स्पष्ट पार्दै सबैको साथ सहयोगबाट विद्यालय सञ्चालन हुने विश्वास लिए ।

नव गठित समितिका अध्यक्ष गुरुङले शैक्षिक गुणस्तर वृद्धिका लागि समिति अहोरात्र खट्ने प्रतिबद्धता व्यक्त गर्दै इमानदारीपूर्वक शैक्षिक क्रियाकलापमा होमिन शिक्षकलाई सुझाव दिए ।

विद्यालयका अध्यक्ष नवीन गुरुङको अध्यक्षतामा भएको कार्यक्रम शिक्षक टंकप्रसाद देवकोटाले सञ्चालन गरे ।

उक्त विद्यालयमा गत वर्षमात्रै निजी स्तरको फ्युचर स्टार आधारभूत विद्यालय तथा केही महिना अघि मात्रै सिद्ध आधारभूत विद्यालय मर्ज भएका छन् । विद्यालयलाई भने चन्द्रकोटबाट लुम्लेस्थित साविक सिद्ध आधारभूत विद्यालयमा सारिएको छ । त्यहाँ हाल कुल २ सय ७० विद्यार्थी अध्ययनरत छन् ।