पोखरा । नेकपा एमाले पोखरा महानगरपालिका कमिटीको दोस्रो नगर अधिवेशन शनिबारदेखि सुरु हुँदैछ । पोखरा सभागृहमा २ दिनसम्म चल्ने अधिवेशनका लागि करिब ५ सय जना प्रतिनिधि छानिएका छन् ।

राज्य पुन संरचनासँगै एमालेले ७ सय ५३ स्थानीय तहमा नै पालिका कमिटी गठन गरेको थियोे । एमाले पोखरा महानगरपालिका कमिटीको दोस्रो अधिवेशनको लागि वडा, जनवर्गीय संगठनबाट प्रतिनिधि चयन गरिएको छ । जसमा १ सय १६ सदस्यीय आयोजक कमिटी, ४८ सदस्यीय सल्लाहकार समिमि, वडा कमिटी २ सय ९६, जनवर्गीय संगठनबाट ३७ समेत गरी कुल ४ सय ९७ जना प्रतिनिधि रहने छन् ।

अधिवेशनको पार्टीका केन्द्रीय वरिष्ठ उपाध्यक्ष ईश्वर पोखरेलले उद्घाटन गर्ने कार्यक्रम छ । उद्घाटन समारोहपछि बन्दसत्रका कार्यक्रम समेत पोखरा सभागृहमै सञ्चालन हुने छन् ।

अधिवेशनबाट अध्यक्ष, उपाध्यक्ष र सचिव १÷१ जना, उपसचिव २ जनासहित १ सय १ सदसयीय कमिटी निर्वाचित हुने एमाले पोखरा महानगर कमिटी अध्यक्ष दिलीप न्यौपानेले बताए ।

यसैबीच, कमिटीले अधिवेशनको लोगो सार्वजनिक गरेको छ । पोखरा झल्किने उक्त लोगोमा एमालेको पार्टीको झन्डा, चुनाव चिन्ह, माछापुच्छ«े हिमालको दृश्य समावेश छ ।