पोखरा । मादी गाउँपालिकामा पालिकास्तरीय बालसञ्जालका पदाधिकारी केन्द्रित बालअधिकारसम्बन्धी अभिमुखीकरण सम्पन्न भएको छ ।

गाउँपालिका अध्यक्ष देवीजङ गुरुङले बालबालिकासँग सम्बन्धित अनेकौ चुनौती रहे तापनि पालिकाले आगामी आर्थिक वर्षको बजेट योजनाको क्रममा रहेकाले बालबालिकाको क्षेत्रमा पनि पर्याप्त बजेट विनियोजन गर्ने बताए । उनले पालिका सदा नमुना बालसञ्जाल रूपमा पहिचान बनाउन तत्पर रहेकाले बालबालिकासँग सम्बन्धित समस्या तथा आवश्यकताबारे समयमै पालिकामा जानकारी गराउनुसमेत अनुरोध गरे ।

गाउँपालिका उपाध्यक्ष कल्पना गुरुङले सञ्जालका पदाधिकारी र अन्य बालबालिकालाई आफ्नो पहिचान, अनुशासन र इमानदारितालाई पहिचान गरेर भविष्यको असल नेतृत्वकर्ता बन्न सुझाव दिइन् ।

प्रमुख प्रशासकीय अधिकृत कमलप्रसाद गौतमले बालसञ्जालको सफल कार्यकालको शुभकामना दिँदै अधिकारसँगै कर्तव्य पालनामा जोड दिन सुझाव दिए ।

याङ्जाकोटमा २ दिनसम्म सञ्चालित अभिमुखीकरणमा राष्ट्रिय बालअधिकार परिषद्, गण्डकी प्रदेशका समन्वय अधिकृत बद्रीप्रसाद वाग्ले भने सहजीकरण गरेका थिए । मादी गाउँपालिकाको आयोजनामा सम्पन्न कार्यक्रममा गुड नेवर्स इन्टरनेसनल नेपाल र नौलो घुम्ती नेपालको साझेदारी रहेको थियो ।

बालबालिकामा लगानी, सुनिश्चित भविष्यको थालनी भन्ने राष्ट्रिय नारा आत्मसात गर्दै आयोजना गरिएको कार्यक्रममा पालिकाका १२ वटै वडाका १३ विद्यालयका २६ बालबालिका तथा बाल क्लब संरक्षक शिक्षकको सहभागिता थियो ।

बालबालिकासम्बन्धी नियमावली २०७८ परिच्छेद २ बमोजिम गठित १३ सदस्यीय पालिकास्तरीय बालसञ्जाल पदाधिकारीको काम, कर्तव्य र अधिकारको विषयमा अभिमुखीकरण कार्यक्रम सञ्चालन गरिएको हो । धनुवास कालिका मावि मादी ७ का बालसञ्जाल अध्यक्ष रेनिशाकुमारी शाहीले अभिमुखीकरण लाभदायक रहेको बताइन् । कार्यक्रम सञ्चालन पालिकाका बालकल्याण अधिकारी कर्णकुमारी गुरुङले गरेकी थिइन् ।