पोखरा । नेपाली कांग्रेस कास्कीले प्रशिक्षण सप्ताह कार्यक्रम सुरु गरेको छ । ७ दिनसम्म चल्ने प्रशिक्षण प्रत्येक दिन ३ सत्रमा सञ्चालन हुने प्रशिक्षणका मूल संयोजक कांग्रेस कास्की उपसभापति एवं प्रशिक्षण शाखा संयोजक रामबाबु भण्डारीले बताए ।

पहिलो पत्रमा राजनीतिक साक्षरताको अर्थ र महत्व, कांग्रेसको आदर्शबारे छलफल हुनेछ । दोस्रो सत्रमा राजनीतिमा निष्ठाको महत्व, बिपी शिक्षाको महत्व र अर्थ, तेस्रो सत्रमा आफैँ माथिको लगानीका बारेमा प्रशिक्षण हुनेछ । सबै दिनको प्रशिक्षण पुरुषोत्तम दाहालले दिने पार्टी प्रवक्ता युवक लामिछानेले जनाए ।

पहिलो दिन बिहीबार जिल्ला, क्षेत्रीय, प्रदेश र पालिका कार्यसमितिका पदाधिकारी सहभागी थिए । प्रशिक्षण सहजीकरणका लागि पार्टीका सहसचिव नवीन सिग्देल संयोजक, कपिलमणि दाहाल र तारादेवी गुरुङ सदस्य रहेको समितिले सहजीकरण गरेका थिए ।

शुक्रबार कास्कीका ७२ वटै वडाका सभापति सहभागी हुनेछन् । यसका लागि सचिव भानु ढकाल संयोजक, सुरेन्द्र अधिकारी र विकास थापा सदस्य रहेको समितिले सहजीकरण गर्नेछन् ।

शनिबार कांग्रेसतर्फबाट निर्वाचित हुने जनप्रतिनिधि सहभागी हुँदैछन् । सो प्रशिक्षणमा सचिव देवेन्द्र रानाभाट संयोजक, धनमाया गुरुङ र वेदहरि तिमिल्सिना सदस्य रहेर सहजीकरण गर्नेछन् । आइतबार तरुण दल र नेविसंघका नेता कार्यकर्ता सहभागी हुनेछन् । जसमा सहसचिव शंकर ढुंगाना संयोजक, वर्षाकेशव पराजुली र दीपक गुरुङ (माइला) सदस्य रहेर सहजीकरण गर्नेछन् ।

सोमबार नेपाल दलित संघमा आवद्ध नेता कार्यकर्ता सहभागी हुनेछन् । यसका लागि प्रवक्ता युवक लामिछाने संयोजक, मनबहादुर लाम्गादे र सरिता तिमिल्सिना सदस्य रहेको समितिले सहजीकरण गर्नेछन् ।

मंगलबार नेपाल महिला संघका नेता कार्यकर्ता सहभागी हुनेछन् । जसमा उपसभापति युवराज कुँवर संयोजक, सीता गुरुङ र मीना पाण्डे सदस्य रहेको समितिले सहजीकरण गर्नेछ ।

अन्तिम दिन बुधबार नेपाल जनजाति महासंघमा आवद्ध नेता कार्यकर्ता सहभागी हुनेछन् । कोषाध्यक्ष माइकल कर्माचार्य संयोजक, चौबहादुर गुरुङ र आशबहादुर गुरुङ सदस्य रहेको समितिले सोको सहजीकरण गर्नेछन् ।