पोखरा । नेपाल निजामती कर्मचारी युनियन कास्की र नेपाल पशु स्वास्थ्य सेवा प्राविधिक संघ (नेल्टा) कास्कीको संयुक्त आयोजनामा मादी गाउँपालिका –१ सिक्लेसमा पशु स्वास्थ्य शिविर तथा निशुल्क औषधी वितरण कार्यक्रम भएको छ ।

गणतन्त्र दिवसको अवसरमा मंगलबार सञ्चालन गरिएको कार्यक्रममा सिक्लेसका करिब २ सय जना किसानका २ हजार पशुपन्छीलाई २ लाख बराबरको औषधी निशुल्क वितरण गरिएको नेपाल निजामती कर्मचारी युनियन कास्कीका अध्यक्ष सुरेशकुमार श्रेष्ठले जानकारी दिए ।

कार्यक्रममा नेपाली कांग्रेस कास्कीका सभापति किशोदत्त बरालले किसानका लागि यस्ता कार्यक्रम निकै प्रभावकारी हुने गरेको बताए । उनले किसानका निम्ति कृषि र पशुधनको व्यावसायिक खेतीपाति गर्नु आवश्यक रहेको बताए ।

कास्कीमा रहेका किसानहरुको आवश्यकतालाई मध्यनजर गर्दै यस खालका कार्यक्रमहरु सञ्चालन गर्दै आएको नेल्टा कास्कीका अध्यक्ष वसन्तराज कोइरालाले बताए । आगामी दिनमा समेत किसानको हित हुने कार्यक्रम ल्याउने प्रतिबद्धता उनले जनाए ।

कार्यक्रममा नेपाली कांग्रेस गण्डकी प्रदेशका सदस्य एवं प्रचारप्रसार प्रमुख रमेश पौडेल, नेपाली कांग्रेस कास्कीका उपसभापति युवराज कुँवर, सचिव देवेन्द्र रानाभाट, सहसचिवद्वय नविन सिग्देल र शंकर ढुंगाना, सदस्य सुरेन्द्र ढुंगाना लगायत निजामती युनियन कास्की र नेल्टा कास्कीका कर्मचारीहरु एवं सिक्लेसका प्रतिनिधिहरुको सहभागिता थियो ।

नेपाल निजामती कर्मचारी युनियन कास्कीका अध्यक्ष श्रेष्ठको अध्यक्षतामा भएको कार्यक्रममा धन्यवाद मन्तव्य युनियन कास्कीका सचिव सुमन शर्माले व्यक्त गरेका थिए ।