पोखरा । गण्डकी सरकार सम्बन्धमा सर्वोच्च अदालतमा परेको रिटको पेसी आज परेको छ । न्याायाधीश कुमार रेग्मी र सुनिलकुमार पोखरेलको इजलासमा बहस नसकिएपछि गत बुधबार उक्त मुद्दा हेर्दाहेर्दैमा राखिएको हो । अघिल्लो मंगलबार पनि न्यायाधीश रेग्मी र पोखरेलको इजलासले हेर्दाहेर्दैमा राखेर बुधबारका लागि पेसी तोकिएको थियो ।

गण्डकीमा सरकार र प्रतिपक्ष दुवैले अहिले सर्वोच्चको आदेश कुरेर बसेका छन् । आदेशकै पर्खाइमा प्रदेश सभाको बेठक समेत प्रभावित भएको छ । असार १ गते प्रदेशको बजेट ल्याउनुपर्ने र त्यसको १५ दिन अघि बजेटको सिद्धान्त र प्राथमिकता पेस गर्नुपर्ने प्रावधान छ । यसका लागि प्रदेश सभाको बैठक भोलिलाई बोलाइएको छ ।

गत बुधबार प्रतिवादीका तर्फबाट १५/१६ जनाले बहस गरेका थिए । अझै केही बाँकी रहेकोले बहस नटुंगिँदा न्यायाधीशले हेर्दाहेर्दैमा राखेका हुन् । आज बहस सकिएपछि आदेश आउने बहसमा संलग्न कानुन व्यवसायीहरु बताउँछन् ।

गण्डकीका निवर्तमान मुख्यमन्त्री एवं कांग्रेस संसदीय दलका नेता सुरेन्द्रराज पाण्डेले प्रदेश प्रमुख, मुख्यमन्त्री, सभामुख समेत ५ जनालाई विपक्षी बनाई गत २५ वैशाखमा उत्प्रेषण रिट दायर गरेका थिए ।

गत २३ वैशाखमा मुख्यमन्त्री खगराज अधिकारीले विश्वासको मत लिने बेलामा सभामुख कृष्णप्रसाद धितालले अधिकारीले प्राप्त गरेको ३० मतलाई नै विश्वासको मत प्राप्त गरेको भनी सदर गरेका थिए । जबकि ६० सदस्यीय प्रदेशसभामा ३१ बहुमत हो ।

सो विरुद्ध पाण्डे सर्वोच्च गएकोमा २८ वैशाखमा न्यायाधीश अब्दुल अजिज मुसलमानको इजलासले अन्तरिम आदेश जारी गरी मुख्यमन्त्री खगराज अधिकारीलाई कामचलाउ बनाइदिएको थियो ।

गत २५ चैतमा सभामुखसमेतको समर्थनमा मुख्यमन्त्रीको दाबी गरेका अधिकारीलाई प्रदेश प्रमुख डिल्लीराज भट्टले दोस्रो कार्यकालका लागि नेपालको संविधान १६८(२) बमोजिम मुख्यमन्त्री नियुक्त गरेका थिए ।