पोखरा । पावर हाउस बजार व्यवस्थापन समितिको आयोजनामा पोखरा २९ र ३० का बासिन्दाको मधुमेह तथा रगतमा हुने खराब बोसो (टिजी) सित्तैमा जाँच गरिएको छ । शिशुवास्थित युआरएल शिशुवा डायग्नोसिस प्रालिको प्राविधिक सहयोगमा बिहीबार भएको शिविरमा २ सय ७५ जनाको सित्तैमा जाँच गरिएको हो ।

न्युरोडमा रहेको युआरएल र यसका शाखाहरुले विभिन्न संघसंस्था सहकार्यमा आयोजना गरेको यो १७२ औं शिविर हो । कार्यक्रममा पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालका वरिष्ठ फिजिसियन डा. कृष्णराज अधिकारीले मधुमेह, टिजी जस्ता रोग नियन्त्रणमा राखे मानिस पूरै जीवन बाच्न सक्ने जनाउँदै हेलचेक्रयाइँ गरे ज्यानै जान सक्ने औंल्याए ।

पोखरा ३० का वडाध्यक्ष दुर्गाप्रसाद सुवेदीले सरकारले गर्नुपर्ने खालको काम बजार समितिले गरेको भन्दै धन्यवाद दिए । यसखालका कार्यक्रम वडाले पनि भविष्यमा गर्ने उनले उल्लेख गरे । युआरएलका अध्यक्ष ठाकुरप्रसाद पन्तले अहिलेसम्म विभिन्न संघ, संस्थासँग सहकार्य गरी भएका १७२ शिविरबाट २ लाखभन्दा बढीले सित्तैमा सेवा पाएको जानकारी दिए । गण्डकी प्रदेशकै पहिलो रेफरेन्स र एकमात्र आइएसओ प्राप्त ल्याब भएकाले सामाजिक उत्तरदायित्व निर्वाहमा पनि युआरएल पहिलो नै बनिरहेको जनाए ।

संस्थाका अध्यक्ष सुरेन्द्र गुरुङको अध्यक्षतामा भएको कार्यक्रममा लेखनाथ उद्योग वाणिज्य संघ महासचिव जानुकादेवी अधिकारी, समितिका वरिष्ठ सल्लाहकार शेरबहादुर गुरुङ,. उपाध्यक्ष राजेन्द्र पौडेल, सचिव विवेक बराल लगायत बोलेका थिए ।