पोखरा । पोखराका विभिन्न स्थानमा अखडा बनाइ लागुऔषध सेवन गर्ने २१ जनालाई प्रहरीले नियन्त्रणमा लिएर सम्झाइबुझाइ गरेपछि अभिभावको जिम्मा लगाएको छ । एकान्त स्थानहरुमा अखडा बनाइ मानिसहरुलाई डरत्रास देखाउने, लुटपाट गर्ने, चोरी गर्ने गरेको अत्याधिक जनगुनासो प्राप्त भएकोले प्रहरीले आइतबार ‘स्विप अपरेसन’ चलाएको थियो । प्रहरीको टोलीले विभिन्न स्थानहरुबाट लागु औषध सेवन गरी लठ्ठ परी बसेका तथा ५÷७ जनाको समूह बनाइ विभिन्न अश्लील शब्दहरु प्रयोग गर्दै होहल्ला गरिरहेका अवस्थामा २१ जनालाई पक्राउ गरिएको हो ।

उनीहरुलाई जिल्ला प्रहरी कार्यालय कास्कीमा लगेर उनीहरुलाई अभिभावकको रोहबरमा प्रशिक्षण गराइएको छ । लागुऔषध नियन्त्रण ब्युुरो शाखा कार्यालय पोखराका प्रवनानि विद्याधर त्रिपाठीले लागुऔषध दुव्र्यसनी, लागुऔषधको प्रयोगबाट हुने असर तथा कानुनी व्यवस्थाका विषयमा प्रशिक्षण प्रदान गरेका थिए । उनीहरुलाई अब आइन्दा लागुऔषध सेवन नगर्ने, लागुऔषध सेवन गर्ने व्यक्ति तथा कारोवारमा संलग्न व्यक्तिहरुको सम्वन्धमा प्रहरीलाई सूचना दिने र असल नागरिक बन्ने प्रतिवद्दता जनाउन लगाएर अभिभावकको जिम्मा लगाइएको जिल्ला प्रहरी कार्यालय कास्कीका डिएसपी वसन्तकुमार शर्माले बताए ।