पोखरा । तमु धिं नेपालले गण्डकी विश्वविद्यालयका कुलपति प्राडा गणेशमान गुरुङलाई शैक्षिक सम्मान अर्पण गर्ने भएको छ । संस्थाको ४० औं स्थापना दिवस अवसरमा यही ५ जेठमा हुने विविध कार्यक्रमबीच उनलाई नगद १ लाख ११ हजार ११ रुपैयाँसहित शैक्षिक सम्मान अर्पण गरिने तमु धिं नेपालका अध्यक्ष हुमबहादुर गुरुङले बताए ।

शिक्षाविद् एवं समाजसेवी गणेशबहादुर गुरुङ स्मृतिकोषबाट प्रदान गरिने शैक्षिक सम्मानबाट यसअघि शैक्षिक व्यक्तित्व जोर्ज जोन र सामाजिक व्यक्तित्व भद्रकुमारी सम्मानित भइसकेका छन् ।

संविधानसभा सदस्य समेत रहेका प्राडा गणेशमान गुरुङको शैक्षिक क्षेत्रमा ठूलो योगदान छ । स्याङ्जाको आँधिखोला १, सिरुवारी गाउँ भई उनी त्रिवि समाजशास्त्र मानवशास्त्र केन्द्रीय विभागका पूर्व प्रमुख, राष्ट्रिय शिक्षा आयोगका पूर्व सदस्य, विश्वविद्यालय अनुदान आयोगका पूर्व अध्यक्ष भइसकेका छन् ।

पोखरा ९, नयाँबजारमा केन्द्रीय कार्यालयको तमु धिं नेपालले दिवसको अवसरमा सरसफाइ, रक्तदान कार्यक्रम, शुभकामना आदानप्रदान, बधाई ज्ञापनसहित विविध सांस्कृतिक कार्यक्रम समेत गर्ने भएको छ । ५ गते गण्डकी प्रदेशका मुख्यमन्त्री खगराज अधिकारीको प्रमुख आतिथ्यमा हुने शुभकामना आदानप्रदानमा सम्मानसहित गण्डकी प्रदेश सरकारमा पुनः नियुक्त भएका मुख्यमन्त्री अधिकारीसहित मन्त्रीहरुलाई बधाई ज्ञापन गरिने कार्यक्रम छ ।