पोखरा । मणिपाल अस्पतालबाट एक्कासि बेपत्ता भएका एक युवक खोजीमा बिहीबार पोखराको सेती बाँध खोलिने भएको छ । जिल्ला प्रहरी कार्यालयले कास्कीले बिहीबार दिउँसो १२ देखि ४ बजेसम्म पोखरा १६, दीपस्थित ड्याम खोलेर युवकको खोजीकार्य गर्ने भएकोले सो क्षेत्रमा सचेत हुन आग्रह गरेको छ।

तनहुँ घर भई हाल पोखरा लामाचौर बस्दै आएका १९ वर्षीय संगम मिश्र २५ मंसिरमा अस्पतालको इमर्जेन्सी बार्डबाटै बेपत्ता भएका थिए । उनीसँगै गएको बाबु औषधि लिन गएको बेला सम्पर्कविहीन भएका र उनको लगाएको कपडा र परिचयपत्र मणिपाल नजिकैको सेती नदीको झोलुंगे पुलमा भेटिएकोले खोजीका लागि बाँध खोल्न लागिएको प्रहरीले जनाएको छ ।

सूचना अधिकारी डिएसपी श्रवणकुमार विकले बाँध खोल्दा सेतीमा पानीको बहाव बढ्न सक्ने हुँदा नदी वरपर काम गर्ने तथा आवतजावत गर्नेलाई सुरक्षा सतर्कता अपनाउन आग्रह गरिएको बताए।