लेखनाथ । लेखनाथ उद्योग वाणिज्य संघले आयोजना गर्न लागेको १९ औं लेखनाथ महोत्सवमा इसेवाबाट पनि टिकट काट्न सकिने भएको छ । युवा विद्यार्थी वर्गलाई लक्ष्य गरी यसपटक इसेवाबाट नै टिकट काट्ने व्यवस्था मिलाइएको टिकट व्यवस्थापन उप–समितिका संयोजक अर्जुन भण्डारीले बताए ।

इसेवाबाट टिकट काट्नेहरुमध्येबाट हरेक दिन १ जनालाई लक्की ड्र को आधारमा बञ्जी जम्प, प्याराग्लाइडिङलगायत अफरसमेत ल्याइएको छ । महोत्सवमा सर्वसाधारणको लागि ८० रुपैंयाँ र विद्यार्थीका लागि परिचयपत्रको आधारमा ५० रुपैंयाँ, बेलुकाको लाइभ कन्सर्टको १ सय ५० रुपैयाँ मूल्य तोकिएको छ । ज्येष्ठ नागरिकका लागि सामाजिक सुरक्षा भक्ता कार्डको आधारमा निशुल्क प्रवेशको व्यवस्था गरिएको छ ।

महोत्सवमा राष्ट्रिय तथा अन्तर्राष्ट्रियस्तरका लघु, घरेलु, साना–ठूला औद्योगिक तथा व्यापारिक प्रतिष्ठानका वस्तु तथा सेवा, हस्तकला, यातायातका साधनहरू, कृषि तथा पशुजन्य वस्तुहरू, विद्यालय स्तरीय शैक्षिक एवं विज्ञान सामग्री, सूचना र सञ्चार प्रविधिमा भएका नयाँ आयामको जगेर्ना, नयाँ प्रतिभाको खोजी अभियान, सांस्कृतिक जगेर्ना कार्यक्रम लगायत कार्यक्रम समावेश गरिएको छ । मेलाबाट स्थानीय उत्पादनको बजारीकरण, नयाँ प्रविधि तथा सिपको हस्तान्तरण, साहित्य, कला र संस्कृतिको जगेर्ना तथा आन्तरिक एवं बाह्य पर्यटक प्रवद्र्धनमा टेवा पुग्ने संघका अध्यक्ष एवं महोत्सवका संयोजक विनोद श्रेष्ठले जानकारी दिए ।