पोखरा । नेपाल पत्रकार महासंघ कास्की सदस्य लक्ष्मीनारायण देवकोटालाई पत्नीशोक परेको छ । उनकी धर्मपत्नी सिर्जना देवकोटाको गत १९ मंसिरमा उपचारका क्रममा निधन भएको हो । उनी ३९ वर्षकी थिइन् ।

गएको ३ वर्षदेखि आन्द्राको क्यान्सरका कारण बिरामी उनको पोखराको गण्डकी मेडिकल कलेजमा उपचार क्रममा निधन भएको हो । उनलाई काठमाडौंस्थित ओम हस्पिटलमा नियमित चेकजाँच गरिँदै आएकोमा ११ दिनदेखि गण्डकी मेडिकलमा भर्ना गरिएको पत्रकार लक्ष्मीनारायण बताउँछन् ।

कास्कीको अन्नपूर्ण गाउँपालिका वडा ६, लुम्ले निवासी देवकोटा दम्पतीका ९ वर्षीय छोरा र १७ वर्षीया छोरी छन् ।

देवकोटा परिवारमा सिर्जनाको निधनले बज्रचोट परेको छ । गत २७ कात्तिकमा लक्ष्मीनारायणका ६६ वर्षीय बाबु श्रीराम देवकोटामाथि हँसिया प्रहारबाट खुट्टा काटिएको थियो । स्थानीय जुमकाजी बिकले सामान्य रिसइबीमा त्यसदिन हँसिया प्रहार गरेका थिए । बिक अहिले कारागारमा छन्।