पोखरा । सामाजिक विकास कार्यालय कास्कीको आयोजनामा पोखरामा २ दिनसम्म सञ्चालन भएको एकल महिलाको लागि नेतृत्व विकास कार्यक्रम शुक्रबार सम्पन्न भएको छ ।

तालिम समापन कार्यक्रममा गण्डकी प्रदेश सभा सदस्य सरस्वती गुरुङले पितृसत्तात्मक सोचका कारण अझै पनि समाज लैंगिक समतामूलक बन्न नसकेको बताइन् ।

राज्यले व्यवस्था गरेका हक अधिकार प्राप्तिका लागि समेत एकल महिलाले थुप्रै चुनौतीको सामना गर्नुपर्ने बाध्यता कायमै रहेको उल्लेख गर्दै उनले समाजमा रहेका कुरीति, कुसंस्कार हटाउनका लागि सबै एकजुट भएर आवज उठाउनुपर्नेमा जोड दिए ।

परिस्थिति र नियतिले एकल हुन पुगेका महिलाको लागि अवसर र चुनौती दुवै रहेको भन्दै उनले आफ्नो क्षमता र दक्षताको अभिवृद्धि गर्दै एकल महिलाले समाजको नेतृत्व गर्नुपर्नेमा जोड दिए ।
जनप्रतिनिधिले जनताको लागि जति सेवा दिनुपर्ने थियो त्यति दिन नसकेको स्वीकार्दै उनले एकल महिलाको हक अधिकार प्रवद्र्धनका लागि गण्डकी प्रदेश सरकारले काम गरिरहेको बताइन् ।

कार्यक्रममा शिक्षा विकास निर्देशननालय गण्डकीका उपमहानिर्देशक घनश्याम पौडेलले राज्यले तालिम र प्रशिक्षण कार्यक्रममा धेरै लगानी गरेको उल्लेख गर्दै तालिमपश्चात् कार्यान्वयनको पाटोका विषयमा समेत ध्यान दिनुपर्नेमा जोड दिए ।

सामाजिक विकास कार्यालय कास्कीका प्रमुख इन्द्रबहादुर थापाले कास्कीका एकल महिलालाई संगठित गर्ने, हक अधिकारका विषयमा जानकारी गराउने र समाजमा नेतृत्व लिने क्षमता अभिवृद्धि गर्ने उद्देश्यले तालिम आयोजना गरिएको बताए ।

नेपाल पत्रकार महासंघका केन्द्रीय सदस्य अधिवक्ता सरिता तिम्सिना पंगेनीले अझै पनि एकल महिलालाई घर परिवार र समाजले हेर्ने दृष्टिकोणमा परिवर्तन आउन नसकेकोप्रति दुख व्यक्त गर्दै समाजमा हुने हरेक गतिविधिमा एकल महिलाको अर्थपूर्ण सहभागिता हुनुपर्नेमा जोड दिइन् । उनले तालिममा सिकेका कुरा व्यवाहारमा उतार्न आग्रह गरिन् ।

अधिवक्ता गीता लामिछानेले महिला हिंसा न्यूनीकरणका लागि आर्थिक सशक्तीकरण जरुरी रहेको बताइन् । सहभागीको तर्फबाट गोमा पराजुलीले तालिम प्रभावकारी भएको सुनाइन् ।

तालिमलाई मानव अधिकारका लागि महिला एकल महिला समूह कास्कीका अध्यक्ष जुना केसी, नेपाल पत्रकार महासंघका केन्द्रीय सदस्य अधिवक्ता सरिता तिम्सिना पंगेनी, अधिवक्ता गीता लामिछाने र अधिकारकर्मी दुर्गा न्यौपानेले सहजीकरण गरेका थिए ।

सामाजिक विकास कार्यालय कास्कीका प्रमुख इन्द्रबहादुर थापाको अध्यक्षतामा भएको कार्यक्रमको सञ्चालन सामाजिक विकास कार्यालय कास्कीका अधिकृत ज्ञानेश्वर सुवेदीले गरेका थिए ।

मानव अधिकारका लागि महिला एकल महिला समूह कास्कीको समन्वयमा सञ्चालन भएको तालिममा कास्कीका २५ जना एकल महिलाको सहभागिता थियो ।