पोखरा । पोखरामा एन्ड्युरो अन्तर्राष्ट्रिय माउन्टेन बाइक रेस सुरु भएको छ । माउन्टेन बाइक कम्पनी डन टिल डस्कको आयोजनामा भएको रेसको पोखरा महानगरपालिकाका मेयर धनराज आचार्यले उद्घाटन गरे ।

पोखरा महानगरपालिका १३ को आर्वा–विजय डाँडा (महाप्रभु धाम)मा सुरु भएको प्रतियोगिता मंसिर ९ गतेसम्म चल्ने छ । मेयर आचार्यले खेल क्षेत्रको विकासको लागि महानगर सदैव तयार रहेको बताए । पोखरालाई खेल पर्यटनको हब बनाउनका लागि प्रशस्त सम्भाव्यता रहेका कारण अन्तर्राष्ट्रिय स्तरका खेल पोखरामा ल्याउन सबैले पहल गर्नुपर्ने उनको भनाइ थियो । पोखरा १३ का वडाध्यक्ष किरण बरालले आर्वालाई अन्तर्राष्ट्रिय स्तरमा चिनाउन प्रतियोगिताले महत्वपूर्ण भूमिका खेल्ने भएकाले खुसी व्यक्त गरे ।

प्रतियोगिताका रेस डाइरेक्टर सुनिलचन्द्र शर्माले एन्ड्युरो माउन्टेन बाइक रेसका लागि पोखरा नै उपयुक्त ठाउँ रहेको बताए । ४ वर्ष अगाडि देखि तयारी गर्दै अहिले पोखरामा रेस सञ्चालन गर्न सफल भएको उनले सुनाए । प्रोफेसन राइडरका लागि इलिट र इ–बाइकको लागि छुट्टै ट्रयाकमा रेस गर्नुपर्ने उनले बताए ।

प्रतियोगितामा नेपालसहित ११ देशका ५६ खेलाडीले सहभागिता जनाएका छन् । इलिट पुरुषतर्फ जुनियर (१२–१८ वर्ष), मास्टर्स ‘क’ (३०–३९ वर्ष), मास्टर्स ‘ख’ (४०–४९ वर्ष), भेट्रान (५० वर्ष माथि), महिला ओपन तथा इ–बाइक गरी ७ विधामा प्रतिस्पर्धा हुनेछन् । इ–बाइक रेस नेपालमै पहिलो पटक हुन लागेको आयोजकले जनाएको छ ।
इलिट पुरुषतर्फका प्रथम हुनेले नगद ५० हजार रुपैयाँ, दोस्रो हुनेले ३० हजार र तेस्रो हुनेले २० हजार रुपैयाँ प्राप्त गर्ने र इलिट महिलातर्फ प्रथम, दोस्रो र तेस्रो क्रमशः ३५ हजार, २५ हजार र १५ हजार रुपैयाँ प्राप्ते गर्नेछन् । अन्य विधामा भने गिफ्ट ह्यापर प्रदान गरिने आयोजकले जनाएको छ ।