पोखरा । १२ औं संस्करणको पोखरा महोत्सव तयारी सुरु भएको छ । युनाइटेड क्लब आयोजनामा अमरसिंह चौरमा हुने यो महोत्सव पोखरा आसपासमा हुने महोत्सवमध्ये ठुलो महोत्सवमा पर्दछ । पुस अन्तिम साता हुने महोत्सवलाई गण्डकी प्रज्ञा प्रतिष्ठानले सहयोग गर्ने भएको छ । महोत्सवमा हुने विद्यालयस्तरीय सामूहिक लोकनृत्य प्रतियोगितालाई प्रतिष्ठाले सहयोग गर्नेबारे बुधबार सम्झौता भएको छ ।

क्लबतर्फ अध्यक्ष राजु श्रेष्ठ, संस्थापक अध्यक्ष हिमालय बख्रेल र प्रतिष्ठानतर्फबाट उपकुलपति गोरे गुरुङ र सदस्यसचिव मनकुमार श्रेष्ठबीच सहमतिपत्रमा हस्ताक्षर भएको हो ।

सो अवसरमा उपकुलपति गुरुङले युनाइटेड क्लब आफैँमा प्रतिष्ठित क्लब रहेको र यसले सामाजिक कामसँगै लोकसंस्कृतिको उजागर गर्ने गरी लोकनृत्य प्रतियोगिता गर्दै आएकोमा सहकार्य गर्न पाउँदा खुसी लागेको बताए ।

संस्थापक अध्यक्ष बख्रेलले प्रतिष्ठानसँग सहकार्य गर्न पाउदा खुसी लागेको बताए ।

अध्यक्ष श्रेष्ठका अनुसार लोकनृत्य प्रतियोगिताको सम्पूर्ण खर्च प्रतिष्ठानले ब्यहोर्ने, पोखरा महोत्सवमा सामूहिक लोक नृत्यलाई हरेक वर्ष सञ्चालन गर्ने, प्रतियोगितामा निर्णायकको निर्णय गर्दा दुवै पक्षको सहमतिमा गर्ने र सम्झौता २०८५ चैतसम्म हुने उल्लेख छ ।