पोखरा । पोखरा–७, रत्नचोकस्थित पूर्व कर्मचारी बचत तथा ऋण सहकारी संस्थाको १४ औं वार्षिक साधारणसभा सम्पन्न भएको छ । सभा उद्घाटन गर्दै संस्थाका प्रमुख सल्लाहकार कृष्णप्रसाद भण्डारीले सेयर सदस्य वृद्धि गर्न पहल गर्नुपर्ने बताए । कास्कीमा ६ सय बढी पूर्व राष्ट्रसेवक कर्मचारी रहेको उनको भनाइ थियो । उनले सदस्यको सेयर रकमबीच समानता ल्याउन आवश्यक रहेको चर्चा गर्दै सेयर रकमलाई २५ हजार, ५० हजार, ७५ हजार तथा १ लाख गरी ४ समूहमा विभाजन गरी संकलन गर्न सुझाव दिए ।

पूर्व कर्मचारी सेवा परिषद्का अध्यक्ष एवं सहकारीका संरक्षक नरहरि बरालले पूर्व कर्मचारीको आधारशिलाका रुपमा सहकारी रहेको स्पष्ट पार्दै सहकारीमार्फत राष्ट्र सेवकको अनुशासन झल्कनुपर्ने औँल्याए ।

निवर्तमान अध्यक्ष कुलप्रसाद भण्डारीले आर्थिक तरलताको वर्तमान अवस्थामा समेत सहकारी मजवुत रहेको तर्क गर्दै निर्धक्कसँग सहकारीमा कारोबार गर्न सुझाव दिए ।

सल्लाहकार रामप्रसाद श्रेष्ठले पूर्व राष्ट्र सेवक सहकारीमा संलग्न रहेकाले कार्यकुशलतापूर्वक संस्था सञ्चालन भइरहेको उल्लेख गरे । त्यस अवसरमा सेयर सदस्यहरु रामचन्द्र पौडेल, छवि सुवेदी, राजुराज अधिकारी, शान्ति शर्मा, भुवानीप्रसाद भट्टराई, विनियमावली पुनर्लेखन समिति संयोजक प्रेमराज गिरीलगायतले पनि धारणा राखे ।

कार्यक्रम बीच भावी योजना समेटिएको अध्यक्ष विष्णुप्रसाद भण्डारीद्वारा प्रस्तुत प्रतिवेदन, सचिव शेखरनाथ लामिछानेद्वारा प्रस्तुत प्रगति प्रतिवेदन, व्यवस्थापक चन्द्रकान्त पौडेलद्वारा प्रस्तुत प्रतिवेदन, कोषाध्यक्ष रामप्रसाद भण्डारीको वार्षिक आर्थिक प्रतिवेदन र लेखा सुपरीवेक्षण समितिका संयोजक सुकदेव नेपालले प्रस्तुत गरेको लेखा सुपरीवेक्षण प्रतिवेदन छलफलसहित अनुमोदन भयो ।

सहकारीका अध्यक्ष भण्डारीको अध्यक्षतामा भएको कार्यक्रममा सदस्य अनन्तराज लम्सालले स्वागत, सदस्य पुष्पराज भण्डारीले सहकारीका ७ सिद्धान्तवाचन एवं व्यवस्थापक चन्द्रकान्त पौडेलले कार्यक्रम सञ्चालन गरे । सहकारीमा हाल ३ सय २० पूर्व कर्मचारी आबद्ध छन् ।