पोखरा । फिस्टेल रेस आयोजक भिआर–४६ ले प्रदेश खेलकुद परिषद गण्डकीको खेलाडी कल्याणकारी कोषमा २५ हजार सहयोग गरेको छ ।

भिआर–४६ का प्रबन्ध निर्देशक माइकल थापाले उक्त रकम सहयोग हस्तान्तरण गरेका हुन् ।

गण्डकी प्रदेश सरकारले चालु आवका लागि सो कोषमा ५ लाख प्रदान गरेको छ ।

भिआर–४६ सो कोषमा रकम दाखिला गर्ने पहिलो संस्थासमेत भएको छ ।

सहयोग गर्दै थापाले खेलाडीको हितमा सहयोग गर्न पाएकोमा हर्षित भएको बताए ।

सहयोगप्रति प्रदेश खेलकुद परिषद् गण्डकीका सदस्यसचिव श्रीधर शर्माले आभार व्यक्त गरे । उनले भने, ‘यो नितान्त खेलाडी, प्रशिक्षक, रेफ्रि र खेल प्राविधिकको हितका लागि गरिएको कोषको व्यवस्था हो । भिआर–४६ ले यसमा सहयोग गरेकोमा आभार व्यक्त गर्दछु ।’

कोष सञ्चालनका लागि बैंक खाता समेत खोली रकम संकलनको सुरुवात गरिसकेको सदस्यसचिव शर्माले बताए । सबै जिल्लामा सूचीकृत भएका रेफ्री, प्राविधिक र खेल प्राविधिकको लगत संकलन कार्य सम्पन्न भइसकेको जनाउँदै उनले जिल्लाबाट संकलित रकमसमेत सोही खातामा जम्मा हुने बताए ।

जिल्लामा सूचिकृत रेफ्री, प्राविधिक र खेल प्राविधिकको वार्षिक जोखिम बिमा र खेलाडीको हकमा प्रतियोगिता अवधिभर कम्तीमा १ महिनाको बिमा हुने गरी परिषदले राष्ट्रिय बिमा संस्थानसँग छलफल अघि बढाएको सदस्यसचिव शर्माले जनाए ।

भिआर–४६ ले आगामी मंसिर ८ र ९ मा पोखरामा फिस्टेल रेसिङ कप–२०२३ आयोजना गर्दैछ । जसमा ७० भन्दा बढीले सहभागिता जनाउँदै छन् ।