पोखरा । एट टु नाइन एफसी पोखराले अन्डर १५ फुटबल खेलकी उदीयमान राष्ट्रिय खेलाडी यशोदा बोहरालाई बुधबार १ लाख नगद सहयोग गरेको छ ।

क्लबले सेभेन ए साइड फुटबल प्रतियोगिता गरी बचत रकम गण्डकी प्रदेश सामाजिक विकास तथा स्वास्थ्य मन्त्री सुशीला सिंखडाले घाइते खेलाडी यशोदाका काका जीतेन्द्रबहादुर बोहरालाई पोखरामा नगद हस्तान्तरण गरिन् । मन्त्री सिंखडाले दुख परेको वेला सहयोग गर्नु नै मानव सेवा भएको बताउँदै युवाहरूले खेलकुदको विकासमा लागेकोमा धन्यावाद ज्ञापन गरिन् ।

पोखरामा बन्द प्रशिक्षणमा रहेको वेला बोहरालाई स्पाइनल कर्डसम्बन्धी समस्या भएको थियो । क्लबले असोज १७ देखि २२ गतेसम्म सेभेन ए साइड फुटबल प्रतियोगिता गरी बचत रकम बोहरालाई प्रदान गरिएको क्लबका उपाध्यक्ष धनराज तामाङले बताए ।

सहयोग हस्तान्तरण कार्यक्रममा क्लबका सचिव नवराज गुरुङले सञ्चालन गरेको कार्यक्रममा क्लबका अध्यक्ष राजेश गुरुङ, रकम संकलनमा सक्रिय सुजु रानाभाट, सरस्वती आधारभूत विद्यालयका प्रधानाध्यापक रुद्रबहादुर रानाभाट, मन्त्रालयका सचिव र पत्रकारहरूको उपस्थिति थियो ।