पोखरा । पाल्पाली समाज पोखराले शुभकामना आदानप्रदान कार्यक्रम गरेको छ । दसैं, तिहार, नेपाल संवत्, छठ पर्व अवसरमा पाल्पाली बहुउद्देश्यीय सहकारी संस्था, पाल्पा हाउस प्रालि र पाल्पा कोलोनी प्रालिसँगको संयुक्त आयोजनामा न्युरोडस्थित पाल्पा हाउसमा आइतबार सो कार्यक्रम भएको हो ।

प्रमुख अतिथि समाजका सल्लाहकार एवं शिवशक्ति क्याम्पसका क्याम्पस प्रमुख चन्द्रकान्त रेग्मीले पाल्पाली समाज पोखराका गतिविधिको प्रशंसा गर्दै चाडपर्व अवसरमा सुखशान्ति र समृद्धिको कामना गरे ।

समाजका संरक्षक एवं सहकारी अध्यक्ष चिरञ्जीवी श्रेष्ठले समाज पछिल्लो समय बृहत् हुँदै गएको बताए ।

समाजका अध्यक्ष बालचन्द्र परियारको अध्यक्षतामा भएको कार्यक्रममा समाजका पूर्व अध्यक्ष एवं सल्लाहकार नारायणप्रसाद पौडल, सल्लाहकार खेमबहादुर सारू, कार्यक्रम संयोजक समाजका सचिव किरण पाण्डे, समाजका प्रथम उपाध्यक्ष श्रीधर पराजुली र महासचिव सञ्जय आत्रेयले शुभकामना मन्तव्य व्यक्त गरेका थिए । समारोहमा पाल्पा हाउसका अध्यक्ष कुलप्रसाद घिमिरे, पाल्पा कोलोनीका अध्यक्ष रेशम थापा लगायत समाजका पूर्व अध्यक्ष, सल्लाहकार, कार्यसमिति पदाधिकारी, सदस्य एवं शुभचिन्तकको सहभागिता थियो ।