पोखरा । नेपाल निजामती कर्मचारी युनियन कास्कीले दसैं, तिहार, नेपाल संवत एवं छठ पर्वको अवसर पारेर शुभकामना आदानप्रदान गरेको छ । सरुवा, बढुवा भएका कर्मचारी सदस्यहरुको स्वागत एवं बिदाइ समेत सोही अवसरमा गरिएको छ ।

कार्यक्रममा गण्डकी प्रदेश सभा सदस्य सरस्वती गुरुङले जनताका काम छिटोछरितो र सर्वसुलभ तबरबाट गरी सुशासनको प्रत्याभूति दिन र सरकारलाई सघाउन निजामती कर्मचारीहरुलाई आग्रह गरिन् ।

सरकारलाई सफल गराउने हात नै निजामती प्रशासनमा रहेको उनको भनाइ थियो । ‘जनताका स–साना कामलाई गरेमा ठूलो उपलब्धि हासिल हुन्छ,’ गुरुङले भनिन्, ‘ विदेश पलायन भइरहेका युवा जनशक्तिलाई यही नै रोजगारी, उद्यमको वातावरण सिर्जना गर्नु आवश्यकतासँगै चुनौती छ ।’

नेपाली कांग्रेस गण्डकी प्रदेशका प्रचार विभाग प्रमुख रमेश पौडेलले कर्मचारी प्रशासन नै सरकारको बल भएकाले नागरिकसँग प्रत्यक्ष सेवा प्रवाहमा सरिक रहनुपर्ने बताए ।

युनियनका पूर्व केन्द्रीय वरिष्ठ उपाध्यक्ष सुरेन्द्र अधिकारीले कर्मचारी प्रशासनले बनाउने नीति राजनीतिक नेतृत्वले स्वीकार गर्न नसक्दा मुलुकमा सुशासन हुन नसकेको बताए ।

नेपाल निजामती कर्मचारी युनियन कास्कीका अध्यक्ष सुरेशकुमार श्रेष्ठको अध्यक्षतामा सम्पन्न कार्यक्रममा प्रदेशका अध्यक्ष दीपक रेग्मी, कास्की कांग्रेसका सहसचिव नविन सिग्देल, कर्मचारी वचत तथा ऋण सहकारी संस्थाका अध्यक्ष महेशकुमार सिग्देल, उपसचिवहरु प्रविण ढकाल, विश्व आचार्य र अम्बिका आचार्य लगायतले कर्मचारीमा एकता कायम राख्दै आफ्नो मनोबललाई उच्च बनाउँदै सेवामा समर्पित हुनुपर्ने बताए ।