पोखरा । ‘इन्टरनेसनल गल्र्स चाइल्ड डे’ का अवसरमा जोन्टा क्लब अफ पोखराले मेण्टल हेल्थ सम्बन्धी सचेतनामूलक कार्यक्रम गरेको छ । पोखराको अमरसिंह माविमा कक्षा ९ मा अध्ययनरत छात्रछात्राहरुमाझ उनीहरुले यो कार्यक्रम गरेका हुन् ।

कार्यक्रममा आयोजक क्लबका अध्यक्ष मोनिका थापाले नेपालमा पनि किशोरावस्थाका बालबालिकाहरुका लागि मनोसामाजिक सुरक्षा कार्यक्रम अत्यन्तै महत्वपूर्ण भएको बताइन् । कार्यक्रममा कोपिला नेपालका बिना सिलवालले नेपालमा १३ देखि १९ वर्ष सम्मका किशोर किशोरीहरुमा मनोसामाजिक शिक्षाको खाँचो रहेको औंल्याइन् । यो उमेरमा नकारात्मक सोंचको विकास भएमा त्यसले दीर्घकालसम्म असर गर्ने भएकाले उनीहरुलाई मनोसामाजिक सुरक्षाका बारेमा अवगत गराउनुपर्नेमा उनले जोड दिइन् । नेपालमा ४ प्रतिशत किशोरकिशोरीहरुमा आत्माहत्याको विचार आउने गरेको उनको भनाइ थियो ।

अमरसिंह माविका प्राचार्य तेजश्वी बरालले जोन्टा क्लबले आफ्नो विद्यालयमा यस्तो कार्यक्रम ल्याएकोमा धन्यवाद ज्ञापन गरे । कार्यक्रममा सिकेका ज्ञानलाई व्यवहारमा लागू गर्न विद्यार्थीलाई आग्रह गर्नुभयो । जोन्टा युएन कमिटी प्रमुख सावी श्रेष्ठको संयोजकत्वमा भएको कार्यक्रम महासचिव नेलिसा ठकुरीले सञ्चालन गरेकी थिइन् ।