पोखरा । गण्डकी विश्वविद्यालय र नेपाली युवा उद्यमी मञ्च पोखराबीच शिक्षा, र उधमशीलताका लागि सम्झौता भएको छ । विश्वविद्यालयको विज्ञान तथा प्रविधि संकायका डिन डा. कपिल अधिकारी र एनवाइइफ पोखराका अध्यक्ष निरन केसीबीच बिहीबार पोखरामा सम्झौतापत्र आदानप्रदान भएको छ ।

कार्यक्रममा विश्वविद्यालयका कुलपति प्राडा गणेशमान गुरुङले उद्यमशीलतामा नयाँ आयम थप्न र उद्यमशीलता सम्बन्धी भावी योजना तर्जुमा गरी अगाडि बढ्न आफूहरु तयार रहेको बताए ।

एनवाइइफ पोखराका अध्यक्ष निरन केसीले तत्कालीन द्वन्द्वको समयमा युवा व्यवसायीहरु पलायन भइरहेको अवस्थामा त्यसलाई रोकन संस्था गठन भएको स्मरण गरे । मञ्चले विशेषगरी युवाहरुलाई लक्ष्य गरेर उनीहरुलाई प्रोत्साहन गर्ने उद्देश्यले विभिन्न प्रकारका कार्यक्रम गर्दै आएको बताए । देशको अर्थतन्त्र र नीतिहरूमा परिवर्तन ल्याउनका लागि मञ्चले सहयोग गर्दै आएको उनको भनाइ थियो । गण्डकी विश्वविद्यालयसँगको सम्झौताले नेपाली युवाहरु विदेशिने क्रमलाई रोक्न र युवाहरुलाई उधमशीलतामा प्रेरित गर्ने विश्वास उनले व्यक्त गरे । विश्वविद्यालयका विद्यार्थीलाई उद्यमशीलता सम्बन्धी कार्यक्रममा सहभागी गराउने प्रतिबद्धता उनले जनाए ।