पोखरा । गोरखाको उत्तरी चुमनुब्री गाउँपालिका–७, छेकम्पारकी ४१ वर्षीया गर्भवती महिलाको हेली उद्धार गरिएको छ । सोमबार पासाङ छेन्जुम लामालाई उद्धार गरेर काठमाडौं लगिएको गाउँपालिकाका प्रमुख प्रशासकीय अधिकृत मनोज लामिछानेले बताए ।

सुरुआतमा उनलाई छेकम्बार स्वास्थ्य चौकीमा लागिएकोमा अवस्था जटिल रहेको भन्दै हेलिकोप्टर मगाइएको थियो । लामाको उद्धार गरी काठमाडौं थापाथली हस्पिटल लगिएकोमा अप्रेसन गर्नुर्ने भएपछि पाटन रेफर गरिएको थियो । लामाले त्यहाँ छोरीको जन्म दिएको चुमनुब्री गाउँपालिका अध्यक्ष निमा लामाले बताइन् ।

यसैबीच, चुमनुब्री गाउँपालिका अध्यक्ष निमा लामाले गोरखाका प्रमुख जिल्ला अधिकारी, स्वास्थ्य सेवाका कर्मचारी, महिला बालबालिका तथा ज्येष्ठ नागरिक मन्त्रालय (हवाई उद्धार शाखा), सम्बन्धित स्वास्थ्य परियोजनाका कर्मचारी, क्याप्टेन लगायत सम्पूर्णप्रति आभार व्यक्त गरेकी छन् ।