पोखरा । प्रदेश खेलकुद परिषद गण्डकीको छैटौं बोर्ड बैठक सोमबार सम्पन्न भयो । परिषद अध्यक्ष एवं सामाजिक विकास तथा स्वास्थ्य मन्त्री सुशीला सिंखडाको अध्यक्षतामा बसेको बैठकले खेलकुदको संस्थागत विकासमा जोड दिने विषयलाई प्राथमिकतामा राख्दै विभिन्न निर्णय गरेको छ ।

बैठकले गण्डकी प्रदेश खेलकुद पदक स्थापना तथा सञ्चालन कार्यविधि २०८० र खेलाडी कल्याण कोषको स्थापना र सञ्चालनसम्बन्धी कार्यविधि २०८० पारित गरेको छ । यस्तै, खेल संघ दर्ता, नवीकरण तथा सञ्चालनसम्बन्धी मापदण्ड २०८० स्वीकृतिका लागि मन्त्रालयमा पठाउने निर्णय भएको परिषद्का सदस्यसचिव श्रीधर शर्माले बताए । प्रदेश खेलकुदको संस्थागत विकासका लागि कार्यविधि र मापदण्ड महत्वपूर्ण रुपमा रहने जनाउँदै उनले मन्त्रालयको स्वस्कृतिपछि २ कार्यविधि र मापदण्डले खेलकुदलाई अझै प्रखर रुपमा अघि बढ्न सहज बनाउने बताए । बैठकले आर्थिक वर्ष २०८०/८१ को वार्षिक विकास बजेटका विषयमा समेत निर्णय गरेको छ ।

मन्त्री सिंखडाले परिषद्का सदस्यहरुलाई प्रदेशको खेलकुद विकासका लागि जिम्मेवारी पूरा गर्न निर्देशन दिइन् । ‘मेरो जिम्मेवारी के हो, म को हो, मैले के गर्नुपर्छ’ यी ३ कुरामा ध्यान दिन सके, खेलकुद विकासले फड्को मार्ने बताइन् ।

खेलकुद विकासमा रहेका कुनै पनि समस्याको हल गर्न आफू तयार रहेको बताउँदै मन्त्री सिंखडाले विभिन्न समस्याका कारण खेल क्षेत्रबाट टाढिएका र समस्यामा रहेकाहरुलाई समेत समेटेर अघि बढने सके खेलकुद अझै प्रभावकारी रुपमा अघि बढन सक्ने बताइन् । मन्त्रालयका सचिव बद्रीनाथ अधिकारीले खेलकुदलाई अनुशासित र मर्यादित बनाउन अझै योजनावद्ध रुपमा अघि बढ्नुपर्ने बताए ।