पोखरा । नेकपा एमाले निकट युवा संघ नेपाल कास्कीले हालै इजरायल र हमास्की लडाइँको चपेटामा परी मृत्यु भएका, घाइते एवं बन्धक बन्न बाध्य नेपालीहरूको छिटोभन्दा छिटो उद्दारको माग राख्दै जिल्ला प्रशासन कार्यालय कास्कीमार्फत् नेपाल सरकारको ध्यानाकर्षण गराएको छ ।

युवा संघ कास्कीका अध्यक्ष पानबहादुर जिसीको नेतृत्वमा जिल्ला प्रशासन कार्यालय कास्कीका सहायक प्रमुख जिल्ला अधिकारी गंगाबहादुर क्षेत्रीलाई ज्ञापनपत्र बुझाउँदै घाइते र पीडितहरूको तत्काल उद्दार गरी सकुशल नेपाल ल्याउने पहल गर्न आग्रह गर्दै ज्ञापनपत्र बुझाएको हो ।

ज्ञापनपत्र बुझाउँदै जिसीले कास्कीका युवाहरू समेत उक्त घटनामा परेको भन्दै यथाशीघ्र जीवन रक्षाका लागि अपिल गरे । सहायक प्रमुख जिल्ला अधिकारी क्षेत्रीले उद्धारका निम्ति सक्रियताका साथ नेपाल सरकार लागि परेको भन्दै सो सबै कास्कीबासीलाई संयमताका साथ उद्धारमा सहयोग गर्न अपिल गरेका छन् ।