पोखरा । श्रवण अपांगता भएका हरुका लागि बबल टी ज्यामिजसम्बन्धी १० दिने तालिम सुरु भएको छ । व्यवसाय प्रवद्र्धन केन्द्र पोखरा र पोखरा–३१ को सहयोगमा तालिम सुरु भएको हो ।

तालिममा कास्की, स्याङ्जा, तनहुँ र लमजुङका २७ जना श्रवण अपांगता भएकाहरु सहभागी छन् ।

तालिममा पोखरा ३१ का अध्यक्ष ढकनाथ कँडेलले सिप सिकेपश्चात् व्यवहारमा उतार्नुपर्नेमा जोड दिए । तालिम लिइसकेपछि व्यवसायमा लाग्न चाहनेलाई ऋण उपलब्ध गराउन सहजीकरण गर्ने वडाध्यक्ष कँडेलले बताए । व्यवसाय प्रवद्र्धन केन्द्रका प्रमुख नवराज अधिकारीले बहिराहरूका लागि ज्यामिज, सैलुन, टेलरिङ जस्ता तालिम उपयोगी हुनेमा जोड दिए । उनले श्रवण अपांगता भएकाहरुका लागि बबल टी सम्बन्धी तालिम दिएर पहिलो खुड्किलो तयार गरेको बताए ।

कार्यक्रममा लेखनाथ उद्योग वाणिज्य संघका उपाध्यक्ष राजेन्द्र ओझाले अपांगता भएका व्यक्तिहरूका लागि पछिल्लो समय तालिम अति आवश्यक रहेको बताए । आर्थिक उपार्जन र रोजगारोन्मुख बाटो पहिल्याउनका लागि तालिम प्रभावकारी हुने उनको भनाइ थियो । गण्डकी बहिरा संघका कोषाध्यक्ष जमानसिंह गुरुङले अन्य संघसंस्थाहरूले पनि बहिरा संघसँग समन्वय गर्दै अघि बढ्नुपर्ने बताए ।

बहिरा फुटबल खेल क्लब पोखराका सहसचिव सूर्यमोहन बरालले राज्यले अपांगता भएका व्यक्तिहरूलाई व्यवसाय सञ्चालन गर्ने वातावरण मिलाइदिनुपर्ने बताए । तालिममा रामकृष्ण अधिकारीले सहजीकरण गर्नेछन् भने दोभाषे अर्चना रोकाले सघाउने छिन् ।