पोखरा । लायन्स क्लब अफ पोखरा सेन्ट्रल गार्डनले पार्वती टोल पोखरा बसपार्कमा कौसी खेती तालिम तथा बिउबिजन सहयोग कार्यक्रम सम्पन्न गरेको छ ।

तालिमको क्लबका संस्थापक अध्यक्ष हरि भाटले उद्घाटन गर्दै क्लबले यो वर्ष महिला लक्षित कार्यक्रमलाई अगाडि बढाएकोमा सोहीअनुरूप कार्यक्रम आयोजना गरिएको बताए ।

कृषि विज्ञ सञ्जीपबहादुर बरालले सहजीकरण गर्दै बजारको महँगीबाट परेको असरलाई थोरै भए पनि न्यूनीकरण गर्न कौसी खेती एउटा सहयोगी माध्यम भएको बताए । उनले कौसीखेतीका नाममा घरको कौसी नै मास्ने तरिकाले नभई विधि र प्रविधिको सही उपयोग गरेर खेती गर्न समेत सुझाव दिए ।

तालिममा सहभागी सम्पूर्णलाई साग, सिमी, बोडीलगायत बिउबिजन सहयोग गर्नुका साथै बिरुवा उत्पादन गर्ने, रोप्ने र रोग लागेमा उपचार विधिसमेत सिकाइएको थियो । कार्यक्रममा पार्वती टोल विकास संस्थाका अध्यक्ष भीमबहादुर पुनले संस्थाले निकै उपयोगी र समय सापेक्ष कार्यक्रम टोलमा ल्याइदिएकोमा आभार व्यक्त गरे ।

कार्यक्रम संयोजक लेखमाया थापाले तालिम निकै प्रभावकारी भएको र क्लबबाट प्राप्त सहयोग बिउबिजनको नर्सरीदेखि उत्पादनमा कुनै समस्या आइपरे पुन: सहयोग गर्नसमेत आग्रह गरिन् ।

लायन वर्ष २०२३/२४ का अध्यक्ष तुल रानाभाटको अध्यक्षतामा सम्पन्न कार्यक्रममा पूर्व अध्यक्ष असफल गौतमको स्वागत र पूर्व अध्यक्ष कृष्ण रानाभाटको सञ्चालन रहेको थियो ।