पोखरा । पृथ्वी राजमार्ग बस सञ्चालक कम्पनीले पोखरामा अग्रिम टिकट बुकिङ खुला गरेको छ । कम्पनीले शनिबार प्रेस विज्ञप्ति जारी गर्दै आइतबारदेखि बुकिङ खुला भएको जानकारी दिएको हो ।

विजयादशमी शुभदीपावली तथा छठ पर्वलाई लक्षित गरी विभिन्न समस्याका बाबजुद पनि बिक्री खुला गरिएको कम्पनीका अध्यक्ष योगेन्द्रबहादुर केसीले जानकारी दिए । आइतबारदेखि कम्पनी कार्यालय पोखरा–८, फेवा मार्ग फिर्के र कम्पनीका अन्य सेवा प्रदायक कार्यालयअन्तर्गतका काउन्टरहरुबाट अग्रिम टिकट उपलब्ध भएको उनले बताए ।

‘हाम्रा मागहरु यथावत् कायम राख्दै माग पूरा नभएमा लामो दूरीमा सञ्चालन हुने दिवा तथा रात्री बसहरुको अग्रिम टिकट बुकिङ नखुलाउने हाम्रो अडानबाट एक स्टेप पछाडि हट्दै चाडपर्वको लागि अग्रिम टिकट बुकिङ खुला गरिएको छ,’ उनले भने, ‘यस कम्पनी प्रालिको रजिस्टर्ड कार्यालय पोखरा–८, फेवा मार्ग फिर्केबाट र कम्पनीका अन्य सेवा प्रदायक कार्यालय अन्तर्गतका काउन्टरहरुबाट अग्रिम टिकट उपलब्ध हुने गरी असोज २१ गतेदेखि यात्रु बस सेवा सञ्चालनमा घाटा सहेर भए पनि अग्रिम टिकट बुकिङ खोल्ने निर्णय गरिएको छ ।’