बेसीशहर । लमजुङ अस्पतालका चिकित्सकमाथि हातपात गर्ने वडाध्यक्ष धरौटीमा रिहा भएका छन् । जिल्ला अदालत लमजुङले बेंशिसहर नगरपालिका ७ का वडाध्यक्ष ऋषिराम बस्नेतलाई १ लाख रुपैयाँ धरौटीमा रिहा गर्न आदेश दिएको हो ।

चिकित्सक कुटेको अभियोगमा उनीमाथि स्वास्थ्यकर्मी तथा स्वास्थ्य संस्था सुरक्षाविरुद्धको कसुरमा मुद्दा चलाइएको थियो । अन्तत: उनी अदालतको आदेशसँग १ लाख रुपैयाँ धरौटी राखेर रिहा भएका हुन् ।

स्वास्थ्यकर्मी तथा स्वास्थ्य संस्था सुरक्षा ऐन, २०६६ दफा ३ को कसुरमा सोही ऐनको दफा १५ अनुसार यस्तो प्रकृतिको मुद्दामा ३ लाख जरिवाना, ३ वर्ष कैद वा दुवै सजाय हुने उल्लेख छ । सोही दफा अनुसार सरकारी वकिल कार्यालयबाट हदैसम्मको सजाय माग गरिएकोमा १ लाख मात्र धरौटीमा बस्नेत रिहा भएका छन् । वादीको तर्फबाट जिल्ला न्यायाधीवक्ता पूर्णबहादुर रानामगर र प्रतिवादी बस्नेतका पक्षबाट अधिवक्ता विजयप्रकाश अधिकारीले वहस पैरवी गरेका थिए ।

गत आइतबार राति डा. सन्दीप अधिकारीमाथि वडाध्यक्ष बस्नेतले हातपात गरेको भन्दै प्रहरीले नियन्त्रणमा लिएको हो ।