पोखरा। काठमाडौंदेखि पोखराका लागि उडेका २ जहाज सोमबार बिहान त्रिभुवन अन्तर्राष्ट्रिय विमानस्थलमै फर्किएका छन् । मौषम खराबीका कारण यती र श्री एयरलायन्सको जहाज फर्किएका हुन् ।

पोखरा अन्तर्राष्ट्रिय विमानस्थलमा प्राविधिक समस्या आएको भनिए पनि त्यस्तो नभई मौषम नै मुख्य बाधक भएको पोखरा विमानस्थलको दाबी छ । विमानस्थल प्रवक्ता जसोदा सुवेदीले उपकरणले काम नगरेर नभई मौषम खराबीका कारण विमान फर्किएको बताइन् । ‘जहाज डाइभर्ट भएकोले वेदर (मौषम) का कारण हो । हाम्रो सञ्चार उपकरणमा समस्या आएर होइन । कसरी समाचार प्रेषित हुन पुग्यो म नै छक्क छु ।’

उनले अगाडि भनिन्, ‘हाम्रो एउटा टेलिफोनमा लाइन सानो डिस्टर्व भाथ्यो, टेलिफोनले गर्दा जहाज डाइभर्ट हुँदैन । टेलिफोन छैन है भनी काठमाडौं टावरलाई खबर गरिएको मात्र हो । लाइन समस्यासमेत समाधान भइसकेको छ।’

मौषम खराबीका कारण अहिले पनि पोखरा अन्तर्राष्ट्रिय विमानस्थलमा कुनै जहाज अवतरण हुन नसकेको उनले बताइन् । सोमबार बिहान एउटा मात्र फ्लाइट भएके थियो । बिहान ७ बजेर ५१ मिनेटमा बुद्ध एयरको जहाज अवतरण भएपछि मौषममा खराबी आएको विमानस्थल प्रवक्ता सुवेदीले बताइन् । बिहान ८ बजेर १३ मिनेट जाँदा यती र श्री एयरलायन्सको विमान डाइभर्ट भएको घोषणा गरिएको थियो ।