पोखरा । ट्रान्सपरेन्सी इन्टरनेसनल नेपाल आवद्ध संस्था सुशासनका लागि नागरिक समाज (सुनास) कास्कीको १७ औ वार्षिक साधारणसभा शुक्रबार पोखरामा सम्पन्न भएको छ । साधारणसभाले सचिव विष्णुप्रसाद अधिकारीले प्रस्तुत गरेको आर्थिक वर्ष २०७९/०८० वार्षिक कार्यक्रम तथा आर्थिक प्रतिवेदन पारित गरेको छ ।

साधारणसभामा शुभकामना मन्तव्य राख्दै संस्थापक अध्यक्ष सुरेन्द्र थापामगरले सुशासन तथा सदाचार प्रवद्र्धनका लागि संस्थाले महत्वपूर्ण कार्य गरेको बताए । उनले संस्था अझै प्रभावशाली भएर जनसरोकारका विषयमा वकालत गर्नुपर्ने सुझाव राखे । पूर्व अध्यक्ष पुण्य पौडेलले देशमा भ्रष्टाचार बढेका कारण संस्थाको महत्व थप बढेको बताए । संस्थाका कार्यक्रम अझै बढाउनुपर्नेमा पौडेलको जोड थियो । सुनासका अध्यक्ष रवीन्द्रनाथ बास्तेलाले सुनास अझै परिस्कृत भएर भ्रष्टाचार विरूद्धको अभियानमा उभिने प्रतिवद्धता राखे । राजनीतिक र प्रशासनिक क्षेत्रमा सुशासन काम राख्न नागरिकको थप खबरदारी आवश्यक रहेको कारण संस्था त्यसतर्फ लाग्ने अध्यक्ष बास्तोलाको भनाइ थियो ।

कार्यक्रममा युवा स्वरोजगार कोषका कार्यकारी निर्देशक विश्वमोहन अधिकारीले सुशासन र सदाचार सम्वन्धी चेतनामूलक कार्यक्रम विस्तार गर्नुपर्ने सुझाव राखे । संस्थाका उपाध्यक्ष सिरोजविजय कोइरालाले स्वागत मन्तव्य राखेकोे कार्यक्रममा कार्यकारी अधिकृत भानु पराजुलीले संस्थामार्फत् भएका कार्यक्रमको उपलव्धिका बारेमा सदस्यहरुलाई जानकारी गराए । सभामा साधरण सदस्यहरुले संस्था अझै सशक्त भएर जनसरोकारका विषयमा नागरिक पैरवी गर्नुपर्नै सुझाव राखेका थिए । २०६५ सालमा कास्कीमा स्थापना भएको संस्था सुनासले गण्डकी प्रदेशमा भ्रष्टाचार विरुद्ध विभिन्न सचेतना र दबाबमूलक कार्यक्रम गर्दै आएको छ । कार्यक्रममा सुनासका पुर्वअध्यक्ष सुन्दर गुरुङसहित ३५ साधारण सदस्यको सहभागिता थियो ।