पोखरा । पोखराका अग्रज पर्यटन व्यवसायी हुतराज श्रेष्ठको निधन भएको छ । उनको उपचारका क्रममा भारतको राजधानी नयाँ दिल्लीमा बिहीबार बिहान ४ः२७ बजे निधन भएको उनका साथी केशव थापाले बताए । उनी ७६ वर्षका थिए ।

केही समयअघि मानसरोवर भ्रमणमा गएका श्रेष्ठ बाटोमै बिरामी परेपछि चीनमा उपचार गराएर पोखरा फर्किएका थिए । फेरि उनलाई समस्या भएपछि काठमाडौं हुँदै नयाँ दिल्ली लगिएको थियो । उनलाई मुटुसम्बन्धी समस्या रहेको केदारेश्वर मन्दिर सेवाश्रम समितिका सचिव खिमबहादुर पहारीले बताए ।

लेकसाइडको बेसक्याम्प रिसोर्ट (हाल-लेकसाइड रिर्टिट) का संचालक उनी समाजसेवी र इतिहासका जानकार थिए । विश्व हिन्दू महासंघ नेपालका पूर्व सचिव उनी केदारेश्वर मन्दिर सेवाश्रम समितिका पूर्व वरिष्ठ उपाध्यक्ष एवं हालका सल्लाहकार थिए । उनका श्रीमती तुमला श्रेष्ठसहित २ छोरा र १ छोरी छन् ।

श्रेष्ठको परिवार नेपालको पूर्वी भोजपुरको ताङवाबाट पोखरा आएको थियो । हाल उनी घारीपाटन बस्दै आएका थिए ।

यसैबीच, श्रेष्ठको निधनमा विश्व हिन्दू महासंघ नेपाल लगायत संघसंस्थाले दुःख व्यक्त गरेका छन् ।

उनको निधनप्रति प्रेस स्वन्त्रता सेनानी बद्रीविनोद प्रतीक लेख्छन्, ‘नेपाल सरकारको अधिकृत पदबाट राजीनामा दिई तीसको दशकमै बेसक्याम्प रिसोर्ट संचालन गरेर पोखराको पर्यटन व्यवसायमा उल्लेखनीय योगदान पु¥याउनुभएका श्रेष्ठको निधनले नेपालको पर्यटन व्यवसायमा अपूरणीय क्षति पुगेको छ ।’