लेखनाथ । लेखनाथ कुटानी पिसानी व्यवसायी समितिको अध्यक्ष विष्णुप्रसाद लमिछाने चयन भएका छन् । संस्थाको बुधबार सम्पन्न १०औं साधारण सभा तथा छैटौं अधिवेशनले लामिछानेलाई अध्यक्षमा चयन गरेको हो ।

१ जना सदस्य पछि थप गर्ने गरी गठित समितिको उपाध्यक्ष सुधनराज अधिकारी, सचिव कृष्ण पौडेल, सह–सचिव तेजकुमारी शाही राणा, कोषाध्यक्ष संगीता बाँस्तोला चयन भए । सदस्यहरु बलप्रसाद पौडेल, तारानाथ भट्टराई, मेखबहादुर गुरुङ, भुवन तिवारी र रीता नेपाली छन् ।

अध्यक्षमा चयन भएपछि प्रतिक्रिया दिँदै लामिछानेले संस्थाका विभिन्न कार्यक्रम र कार्ययोजनालाई समयसापेक्ष परिमार्जन गर्दै व्यवसायमा आधुनिकीकरण गर्ने प्रयासमा आफू लाग्ने र सम्पूर्ण कुटानी पिसानी व्यवसायीको शिर कहिल्यै नझुक्ने गरी सबैलाई समेटेर कार्य गर्ने प्रतिबद्धता व्यक्त गरे ।

यसअघि साधारण सभा तथा अधिवेशन उद्घाटन गर्दै लेखनाथ उद्योग वाणिज्य संघका निवर्तमान अध्यक्ष छत्रधर आत्रेयले संघ सम्पूर्ण उद्योगी व्यवसायीहरुको साझा संस्था भएको बताउँदै संस्थागत सदस्यको रुपमा आबद्ध हुन आग्रह गरे ।

कार्यक्रममा संस्थाका संस्थापक अध्यक्ष रामजी पौडेल, होटल तथा रेस्टुरेन्ट एसोसियसन लेखनाथका अध्यक्ष वीरभद्र कँडेल, संस्थाका सल्लाहकार टीकाप्रसाद खनाल, कार्यसमिति सदस्य कृष्णप्रसाद पौडेल, व्यवसायीको तर्फबाट वीरेन्द्र बानिया लगायतले बोलेका थिए ।

यसैबीच लेखनाथ उद्योग वाणिज्य संघको हालै सम्पन्न महाधिवेशनबाट निर्वाचित पदाधिकारी एवं सदस्यलाई बधाई तथा सम्मान गरिएको थियो ।

संस्थाका अध्यक्ष टीकाराम भुर्तेलको अध्यक्षतामा भएको कार्यक्रमको सञ्चालन सचिव सुधनराज अधिकारीले गरेका थिए ।