पोखरा । सिप हस्तान्तरण सशक्तीकरण (नेस्ट),पोखराको २१ औं वार्षिक साधारण सभा शनिबार सम्पन्न भएको छ । सभाको जिल्ला समन्वय समिति कास्कीका प्रमुख लीलाधर पौडेलले उद्घाटन गरे । पौडेलले गैरसरकारी संस्थाहरू पारदर्शी र राज्यप्रति थप जवाफदेही हुनुपर्नेमा जोड दिए ।

आफ्नो कार्यक्षेत्रप्रति स्पष्ट हुनुपर्ने भन्दै पौडेलले गैरसरकारी संस्थाहरू सरकारका सहयोगी सहयात्री भएको हुँदा सरकारी निकायसँग प्रभावकारी समन्वय गर्न आग्रह गरे ।

कार्यक्रममा गैरसरकारी संस्था महासंघ कास्कीका अध्यक्ष डा. बुद्धिबहादुर थापा, गैरसरकारी संस्था महासंघ गण्डकीका अध्यक्ष गोपाल खड्का, वैदेशिक रोजगार बोर्डका अधिकृत शिव रेग्मी, पोखरा महानगरपालिका सामाजिक विकास अधिकृत गीता न्यौपाने, पोखरा ८ का वडा सदस्य तथा कार्यपालिका सदस्य पवित्रा केसी लगायतले बोलेका थिए ।

साधारण सभाले सूर्यप्रसाद न्यौपानेले पेस गरेको सचिवको प्रतिवेदन र सञ्जय सुवेदीले पेस गरेको कोषाध्यक्षको प्रतिवेदन सर्वसम्मत पारित गरेको थियो ।

संस्थाका अध्यक्ष आनन्दकुमार पराजुलीको अध्यक्षतामा भएको कार्यक्रम सचिव सूर्यप्रसाद न्यौपानेले सञ्चालन गरेका थिए ।