पोखरा । ४४ औं विश्व पर्यटन दिवस (२७ सेप्टेम्बर) मा पोखरामा मिनी सडक महोत्सव आयोजना गरिने भएको छ ।

गण्डकी प्रदेश उद्योग, पर्यटन, वन तथा वातावरण मन्त्रालयको प्रवद्र्धनमा हुने महोत्सव लेकसाइडको वाराहीचोकदेखि खहरेचोकसम्म यातायात रोकेर महोत्सव गरिने पोखरा पर्यटन परिषद् अध्यक्ष पोमनारायण श्रेष्ठले बताए ।

असोज १० गते हुने महोत्सवमा नेपाल र भारतका सांस्कृतिक कार्यक्रम प्रस्तुत गर्ने कार्यक्रम रहेको छ । महोत्सवमा नेपालका विभिन्न सांस्कृतिक झाँकीसहित र्‍यालीको आयोजना गरिएको आइतबार आयोजित पत्रकार सम्मेलनमा परिषद् अध्यक्ष श्रेष्ठले बताए । रेवान आयोजनामा उक्त दिन साँझ ५ देखि सुरु हुने महोत्सवको नारा सडकमै खाऔं, सडकमै रमाऔं तय गरिएको छ । महोत्सव अंग्रेजी नयाँ वर्ष अवसरमा हुने पोखरा सडक महोत्सवको सानो रुप हो ।

मिनी महोत्सवमा नेपाल र भारतका विभिन्न सांस्कृतिक कार्यक्रम प्रदर्शन गरिनेछ । साथै बाजागाजा, झाँकीसहितको र्‍याली निकालिने छ । पर्यटकलाई फूलमालाले स्वागत गर्ने कार्यक्रम छ । जसले पोखरामा आन्तरिक एवं बाह्य पर्यटक भिœयाउन मद्दत पुग्ने आयोजकको अपेक्षा छ ।

दिवसको अघिल्लो दिन ९ असोजमा पोखराकै मार्गीदेखि पुम्दीकोटसम्म एक दिने पदयात्रा राखेको टान अध्यक्ष धर्म पन्थीले बताए । साथै पर्यटन दिवस अवसरमा भारतका टुर अपेरटर र सञ्चारकर्मीसँग पोखरामा अन्तक्र्रिया समेत आयोजना गरिएको छ । उक्त कार्यक्रममा नेपालका लागि भारतीय राजदूत नवीन श्रीवास्तव पनि सहभागी हुने छन् । भारतीय टुर अपरेटर र सञ्चारकर्मीलाई मुक्तिनाथ र गोरखा घुमाउने योजनासमेत छ । भारतीय पर्यटकलाई आकर्षित गर्न उक्त कार्यक्रम राखिएको आयोजकले बताएको छ ।

४४ औं विश्व पर्यटन दिवस आगामी १० असोजमा मनाइँदैछ

गण्डकी प्रदेश सरकारले विश्व पर्यटन दिवस प्रदेशका ११ वटै जिल्लामा मनाउने तयारी गरेको छ । पर्यटकलाई स्वागतदेखि अन्तक्रियात्मक कार्यक्रम राखेर दिवस मनाउन लागिएको पर्यटन मन्त्रालय गण्डकीका सचिव कुमानसिंह गुरूङले जानकारी दिए । प्रदेशले ग्रामीण पर्यटन प्रवद्र्धन र पर्यटकीय पूर्वाधारमा लगानी गरेको उनले बताए । ११ जिल्लामा पर्यटकीय गन्तव्य बनाउन प्रदेशले विस्तृत परियोजना प्रतिवेदन र वातावरणीय अध्यन गरिरहेको छ । जसमध्ये ६ वटा गन्तव्यको परियोजना तयार भएर कार्यान्वयनमा गएको सचिव गुरूङले बताए ।

दिवसको दिन नाट्टा गण्डकीले पोखरा पर्यटक बसपार्कमा वृक्षरोपण गर्नुका साथै रक्तदान गर्नेछ । साथै पोखरास्थित पर्यटकीय संघसंस्थाले पोखरा अन्तर्राष्ट्रिय विमानस्थल तथा पोखरा पर्यटक बसपार्कमा ओर्लिने पहिलो पर्यटकलाई स्वागत सम्मान गर्ने छन् ।

पर्यटन दिवसको मूल समारोहको उद्घाटन भने गण्डकी प्रदेशका मुख्यमन्त्री सुरेन्द्रराज पाण्डेले उद्घाटन गर्नेछन् । जसमा गण्डकीका पर्यटनमन्त्री दीपेन्द्रबहादुर थापा, भारतीय राजदूत श्रीवास्तव र पोखरा महानगरपालिकाका प्रमुख धनराज आचार्यको उपस्थिति हुनेछ ।

पछिल्लो समय कोरोना महामारीपछि चलायमान हुन लागेको पोखराको पर्यटनलाई थप टेवा दिन पर्यटन दिवसमा हुने कार्यक्रमले विशेष महत्व राख्नेमा आफूहरू आशावादी रहेको पोखरा पर्यटन परिषद्का अध्यक्ष श्रेष्ठले बताए ।

सन् २०२३ अहिलेसम्मकै धेरै तापक्रम भएको वर्ष रह्यो । मौसम परिवर्तन र दिगो अर्थतन्त्रको विकासको समाधान खोज्नु अहिलेको मूल चुनौती रहेको भन्दै विश्व पर्यटन दिवसको नारा समेत ‘टुरिजम एन्ड ग्रिन डेभलपमेन्ट’ तय गरिएको छ ।