पोखरा । राष्ट्रिय शैक्षिक तथा सामाजिक संस्था नेष्डोबाट पत्रकार, कलाकार तथा व्यवसायी सम्मानित भएका छन् । ४४ औं सामाजिक सेवा दिवसको अवसरमा शनिबार पोखरामा आयोजित एक समारोहबीच संस्थाले सम्मान गरेको हो ।

विगत २ दशकभन्दा बढी पोखरामा रहेर सञ्चारकर्ममार्फत् आम नागरिकलाई सुसूचित गराउन विशिष्ट योगदान पुर्‍याएकोमा पत्रकार कमल पौडेल अथकलाई सम्मान गरिएको संस्थाका अध्यक्ष विश्वप्रकाश प्रसाईंले जानकारी दिए ।

अथकलाई नगद, सम्मानपत्र र दोसल्लासहित सम्मान गरेको हो । अथक रेडियो सराङकोटका समाचार प्रमुख एवं समयदृष्टि डटकमका प्रधानसम्पादक हुन् ।

संस्थाले लोकगायिका सरस्वती लामिछाने र पर्वतका पर्यटन व्यवसायी शिव शर्मालाई पनि सम्मान गरेको छ । संस्थाले देशका विभिन्न जिल्लाका १४ जना क्यान्सरका बिरामीलाई जनही ७ हजार सहयोग गरेको संस्थाले जनाएको छ ।