पोखरा । बायोमी इन्टरनेसनल युकेको सहयोगमा अन्नपूर्ण ३ स्थित लक्ष्मी आधारभूत विद्यालयमा शुक्रबार झोला तथा शैक्षिक सामग्री वितरण गरिएको छ ।

बायोमीका नेपालस्थित प्रबन्ध निर्देशक राजेन्द्र अधिकारीको उपस्थितिमा ५५ थान झोला तथा स्टेसनरी वितरण गरिएको हो । प्रबन्ध निर्देशक अधिकारीले आफू हुर्केको ठाउँस्थित विद्यालयको शैक्षिक उन्नयनका लागि सहयोग गर्न पाएकोमा खुसी लागेको बताए । उनले आगामी दसैंको अवसर पारेर विद्यार्थीलाई पोशाक पनि उपलब्ध गराउने प्रतिबद्धता जनाए ।

बायोमीका निर्देशक भावना थापाले संस्थाले विभिन्न विद्यालयको शैक्षिक क्षेत्रमा सहयोग गर्दै आएको जानकारी दिइन् ।

विद्यालय अध्यक्ष डिलबहादुर क्षत्रीले सहयोगप्रति धन्यवाद ज्ञापन गर्दै आगामी दिनमा पनि सहयोग बढाउँदै जान अनुरोध गरे । पूर्व विद्यार्थी लोकनाथ पौडलले सहयोग आफैँमा महत्वपूर्ण हुने स्पष्ट पार्दै कार्यक्रम समन्वय गर्न पाएकोमा खुसी व्यक्त गरे ।

त्यस अवसरमा वडा सदस्य कृष्णप्रसाद पौडेल, विद्यालय व्यवस्थापन समिति तथा शिक्षक अभिभावक संघ सदस्य, पूर्व विद्यार्थी, समाजसेवी, अभिभावक, विद्यार्थी लगायतको उपस्थिति रह्यो । विद्यालय अध्यक्ष क्षत्रीको अध्यक्षतामा भएको कार्यक्रममा प्रअ टंकप्रसाद भण्डारीले स्वागत तथा शिक्षक तारानाथ पौडेलले सञ्चालन गरेका थिए ।