लमजुङ । जिल्लास्तरीय अन्तरवडा भलिबल प्रतियोगिताको उपाधि राइनास नगरपालिका–५ ले जितेको छ ।

फाइनलमा मध्यनेपाल नगरपालिका–५ लाई ३–२ सेटले पराजित गर्दै उसले उपाधि जितेको हो । प्रतियोगितामा १० टिमले भाग लिएका थिए ।

प्रतियोगितामा राइनास ५ का कुशल श्रेष्ठ र अमृत गुरुङ क्रमश: उत्कृष्ट स्पाइकर र उत्कृष्ट सेटरको उपाधि प्राप्त गरेका छन् । उपविजेता टिमका सरोज कुमालले उत्कृष्ट खेलाडीको उपाधि प्राप्त गरे ।

आयोजक क्लब पूर्व अध्यक्ष विष्णु गुरुङका अनुसार प्रतियोगितामा पहिलो हुने टिमलाई ४० हजार नगद, शिल्ड, ट्रफी र प्रमाणपत्र, दोस्रो हुने टिमका लागि २५ हजार नगद, ट्रफी र प्रमाणपत्र प्रदान गरिएको छ । उत्कृष्ट उपाधि पाएका ३ जनालाई जनही १ हजार नगद, ट्रफी र प्रमाणपत्र प्रदान गरियो ।

मस्र्याङ्दी गाउँपालिका–६, बाहुनडाँडा स्थित स्थानीय योगस्टार युवा क्लबको २७ औं वार्षिकोत्सव अवसरमा सो प्रतियोगिता गरिएको हो ।

समापनमा मस्र्याङ्दी गाउँपालिका– ६ का वडाध्यक्ष मीनराशि गुरुङ, क्लबका अध्यक्ष पवित्रा गुरुङले संयुक्त रुपमा पुरस्कार र प्रमाणपत्र वितरण गरेका हुन् । आयोजक क्लबका अध्यक्ष पवित्रा गुरुङको अध्यक्षतामा भएको समापन कार्यक्रमको सञ्चालन पूर्व अध्यक्ष विष्णु गुरुङले गरेका थिए । प्रतियोगिताको मस्र्याङ्दी गाउँपालिकाका अध्यक्ष अर्जुन गुरुङले उद्घाटन गरेका थिए ।