लेखनाथ । पोखरा वडा ३० र ३१ को संगमस्थल मोहोरीयामा मोहोरीया कृषि सहकारी संस्था लि. सञ्चालनमा आएको छ ।

पोखरा महानगरपालिका सहकारी कार्यालयका प्रमुख रविरमण तिवारीले सहकारी उद्घाटन गर्दै सहकारी सञ्चालक सहकारीको नीतिनियमबारे स्पष्ट हुनुपर्ने बताए । सञ्चालक सदस्यहरुको सहकार्यबाट मात्रै सहकारी अगाडि बढाउन सकिने उल्लेख गर्दै तिवारीले सहकारीमार्फत सिप सिकाइ, व्यावसायीकरण र क्षमता अभिवृद्धि गर्न आग्रह गरे ।

पोखरा ३० का वडा सदस्य विनोदप्रसाद लामिछानेले सहकारीहरु सहकारीको नीति, नियम र आफ्नो क्षेत्रभित्र रहेर कार्य गरेमा सहकारी सफल हुने बताए ।

सहकारी अध्यक्ष अनन्त कँडेलले सहकारीले हाल पोखरा ३० र ३१ लाई कार्यक्षेत्र बनाएर अघि बढ्ने बताए । उनका अनुसार हाल सहकारीमा ५० जना सदस्यहरु छन् । सहकारी सञ्चालक समिति सदस्य सागर लामिछानेले स्वागत गरेको कार्यक्रमको सञ्चालन समितिका सचिव त्रिलोचन लामिछानेले गरेका थिए ।