पोखरा । गणेशमान सिंह फाउन्डेसन कास्कीको आयोजनामा मंगलबार सिंहको २६ औं स्मृति दिवस मनाइएको छ । त्यस अवसरमा प्रवचन कार्यक्रम गरियो । कार्यक्रममा नेपाली कांग्रेसका सहमहामन्त्री भिस्मराज आङदाम्बेले स्व: सिंहबाट नेपाली राजनीतिले इमानको पाठ सिक्नुपर्ने औंल्याउँदै राजनीति निष्ठापूर्वक गर्नुपर्ने बताए ।

कार्यक्रममा नेपाली कांग्रेस गण्डकी सभापति शुक्रराज शर्मा, कास्की सभापति किशोरदत्त बराल, प्रजातन्त्र सेनानी कृष्णबहादुर कुँवर, पूर्व जिल्ला सभापति सोभियतबहादुर अधिकारी, संविधान सभासद् शारदा पौडेल लगायतले पनि धारणा राखे ।

उनीहरुले गणेशमानको राजनीतिक जीवनी, त्याग, नेतृत्व क्षमता, कार्यकर्ता प्रतिको विश्वास, निडर पन लगायतका बारेमा प्रकाश पार्दै प्रजा परिषद्देखि २०४६ को जनआन्दोलनसम्मको प्रजातान्त्रीक आन्दोलनमा सिंहको भूमिका महत्वपूर्ण रहेको धारणा राखे ।

त्यस अवसरमा प्रजातन्त्र सेनानी, अग्रज नेता, कार्यकर्ता, प्रदेश, जिल्ला, क्षेत्र, महानगर, गापाका पदाधिकारी एवम् सदस्य, भातृसंस्थाका पदाधिकारी, महासमिति सदस्य, महाधिवेशन प्रतिनिधि लगायतको सहभागिता रह्यो ।

कार्यक्रमका बीच हालै नेविसंघको केन्द्रीय सदस्य छनोट भएका कास्कीका विद्यार्थी नेतालाई सम्मान गर्दै बधाई समेत दिइयो ।

फाउन्डेसनका सचिव मुक्तिराम अधिकारीको अध्यक्षतामा भएको उक्त कार्यक्रममा सदस्य दुर्गाप्रसाद तिमिल्सिनाले स्वागत तथा फाउन्डेसनका सल्लाहकार दीपकराज पौडेलले कार्यक्रम सञचालन गरे ।