लेखनाथ । पोखरा ३२ को साझा सांस्कृतिक समूहद्वारा आयोजित ५ औं खुला तीज गीत प्रतियोगितमा ब्रह्मरुपा माध्यमिक विद्यालयका छात्राहरुको समूह प्रथम भएको छ । प्रतियोगितामा सातमुहाने ठकुरी समाज द्वितीय र आदर्श दिदीबहिनी समूह तृतीय भएका छन् । प्रथम, द्वितीय र तृतीय हुने समूहले क्रमश: १० हजार रुपैयाँ, ५ हजार रुपैयाँ र २ हजार रुपैयाँ पुरस्कार प्राप्त गरे । युनिभर्स बोर्डिङ स्कुलकी छात्रा प्रीति गुरुङले उत्कृष्ट नृत्य प्रस्तुत गरेको निर्णायक संयोजक शिवहरि पौडेलले जानकारी दिए । प्रतियोगितामा १४ समूहबीच प्रतिस्पर्धा भएको थियो ।

विविध सांस्कृतिक कार्यक्रमका साथ सुरु भएको खुला तीज प्रतियोगितामा देउराली नेवा:खलले तायमचा र लाखे नाच प्रस्तुत गरेको थियो ।

विजयी समूहलाई सातमुहाने साझा सांस्कृतिक समूहका अध्यक्ष शिवराज ढुंगानाले पुरस्कार र प्रमाणपत्र वितरण गरेका थिए भने संस्थाका सदस्य कुमार थापाले कार्यक्रम सञ्चालन गरेका थिए ।