मेरो दृष्टिकोणमा जुन संविधानलाई स्वीकार गरेर यहाँ आइपुग्यौं, अब रोकिएर सबैभन्दा पहिले नमिलेका कुरा मिलाउनुपर्छ । हामी विब्प्याँटो बाटोमा हिँडेका छौं । संघीयता देशले धान्न सक्दैन, यो खारेज गर्नुपर्छ । हामी संविधानको व्यवस्थालाई प्रयोग गरेर नै संसदमा छौं तर संविधानबाट संघीयता हटाउनुपर्छ । आज सोध्नुस् न, जसले आन्दोलन गरेर यो संविधान बन्यो, उहाँहरु नै खुसी हुनुहुँदैन । अनावश्यक खर्च बढेको छ । जसले संविधान चाहेको थियो, उनीहरु नै खुसी छैनन् भने हामीले कसका लागि संविधान बनायौं त ? प्रश्न सामान्य होइन । संविधानले ३३ प्रतिशत महिला सहभागिता, आदिवासी जनजाति, दलित लगायतको सहभागितालाई सुनिश्चित गरेको छ । यो सुन्दर पक्ष हो । तर अहिले पनि महिलालाई पार्टीले टिकट दिन हिचकिचाउँछ । यो भनेको कार्यान्वयनको चुनौती हो ।

केही पक्षहरु सुन्दर छन् । वाक स्वतन्त्रताका विषय यो संविधानले ज्ञारेन्टी गरेकै कारण आज हरेक दलका नेता जेल गएका छन्, भ्रष्टाचारका मुद्दा लागेका छन् । व्यवस्थामा फरक मत राख्नेहरु पनि यही व्यवस्थामा अटाएका छौं, प्रतिभा देखाउन पाएका छौं । यो संविधानकै उपलब्धि हो । म संसदमा आएपछि एउटा तीतो अनुभव चाहीँ गरेको छु, कानुन निर्माण सत्ता पक्षले मात्रै गर्दो रहेछ । संसद प्रतिपक्षको भने पनि सरकारकै छायामा हराउँदो रहेछ । संविधानलाई स्वीकारेर आएपछि असफल बनाउने पक्षमा हामी छैनौं । त्यसैले हाम्रा कुरा पनि सुन्नुपर्छ । जनताले संघीयता र धर्म निरपेक्षतालाई स्वीकारेका छैनन् । संविधानका सुन्दर पक्षलाई शुभकामना छ, विकृति हटाउने चेत सबैमा आओस् ।